«Եթե պիտի ապօրինի հարստացած մարդը պատասխանատվության ենթարկվեր, դա պետք է լիներ Նիկոլ Փաշինյանի պաշտոնավարման 8-րդ տարո՞ւմ։ Դա ոնց որ ինքը մեզ առաջին տարում էր խոստացել»,- «Հայելի»-ի եթերում ասել է ԱԺ «Ուժեղ Հայաստան» խմբակցության պատգամավոր Էդգար Ղազարյանը՝ խոսելով ՊԵԿ նախկին նախագահ Գագիկ Խաչատրյանի կալանավորումից։
«Բացե՛ք տեսանյութերը, տեսե՛ք՝ Գագիկ Խաչատրյանի տղաները ոնց էին գոհունակություն հայտնում Նիկոլ Փաշինյանի կառավարության ծրագրերից, համատեղ միջոցառումներ կազմակերպում, իրեն հրավիրում, ինքը գնում մասնակցում էր․ գլխի՞ չէր ընկել, թե նրանք ում տղաներն են, էդ բիզնեսների հիմքում ինչ գործընթացներ կան։ Այսինքն՝ որ պահին որ Գագիկ Խաչատրյանը, նրա տղաները Նիկոլ Փաշինյանի գործընկերներն են, համագործակցում են՝ սաղ նորմալ ա, որ պահին չէ, ինքը քնում-հելնում ա, 8 տարի հետո հիշում, որ Գագիկ Խաչատրյանը ժամանակին կոռուպցիայով է զբաղվել, ապօրինի հարստություն է կուտակե՞լ»,- նշել է ընդդիմադիր գործիչը՝ շեշտելով, որ կոռուպցիայի դեմ պայքարում իրավապահ մարմինները կարող են իրենց գործունեությունը կազմակերպել նաև օրինականության և հումանիզմի պայմաններում։ «Հիմա անշարժ մարդուն ձերբակալելը քրեական վարույթի հետ ի՞նչ կապ ունի, ի՞նչն էր խանգարում քննիչին շարունակել գույքերի նկատմամբ իր օրինական հետապնդումը, եթե Գագիկ Խաչատրյանը շարունակեր մնալ իր տան անկողնում»,- հավելեց Ղազարյանը։