Հայաստանը եվրոպական տնտեսական և առևտրային նորմերին իր օրենսդրությունն ու կարգավորումները համապատասխանեցնելու գործընթացում ավելի առաջ է գնացել, քան դա հաճախ ընկալվում է Գերմանիայում, Известия-ին հայտնել է Բունդեսթագի պատգամավոր Մաթիաս Մոսդորֆը։

«Գործընկերության համաձայնագիրը (CEPA) արդեն համապարփակ հիմք է ստեղծում այնպիսի ոլորտներում մերձեցման համար, ինչպիսիք են մրցակցությունը, պետական գնումները, արտադրանքի անվտանգությունը, մաքսային վարչարարությունը և իրավական որոշակիությունը»,- ասել է նա։

Միևնույն ժամանակ, անիրատեսական կլիներ խոսել ինտեգրման լիարժեք պատրաստակամության մասին, նշել է Մոսդորֆը։

«Հետագա համապատասխանեցում է անհրաժեշտ, մասնավորապես, օրենքների միասնական կիրառման, պետական կառավարման մարմինների և դատական համակարգի անկախ ու կանխատեսելի գործունեության, կոռուպցիայի դեմ պայքարի, ինչպես նաև առևտրի տեխնիկական և սանիտարական չափանիշների պահպանման հարցերում։ Բացի այդ, պետք է հաշվի առնել Հայաստանի մասնակցությունը Եվրասիական տնտեսական միությանը»,- հայտարարել է քաղաքական գործիչը։

Ուստի, պատգամավորի համոզմամբ, մերձեցման գործընթացը պետք է լինի գործնական և փուլային։

***

Նիկոլ Փաշինյանն աշխատանքային այցով մեկնել է Գերմանիայի Դաշնային Հանրապետություն:
Այցի շրջանակում Վիսբադենում՝ Հեսսենի դաշնային երկրամասային խորհրդարանում, հանդիսավոր արարողության շրջանակում Հարավային Կովկասում խաղաղության հաստատմանն ուղղված ջանքերի համար ՀՀ վարչապետին կշնորհվի Հեսսեյան Խաղաղության մրցանակը:
Հաջորդիվ Նիկոլ Փաշինյանը Ֆրանկֆուրտի արդյունաբերության և առևտրի պալատում հանդիպում կունենա տեղի գործարարների հետ: