Այսօր տեղի է ունեցել «Բեսթ Լայֆ» հայ-ճապոնական բժշկական կենտրոնի բացումը, որին ներկա է եղել նաև Առողջապահության նախարար Արսեն Թորոսյանը:
Նախարարը շրջել է բժշկական կենտրոնով, ծանոթացել բուժանձնակազմի հետ և սարքավորումներին:
«Ուզում եմ Ձեր ուշադրությունը հրավիրել այն հանգամանքի վրա, որ օտարերկրյա ներդնողները Հայաստանում տեղի ունեցած քաղաքական փոփոխություններից հետո սկսել են շոշափելի ներդրումներ կատարել, որի վառ ապացույցներից է նաև այս կենտրոնի բացումը: Այս կենտրոնը կարևոր է դեր է ունենալու Հայաստանում սրտանոթային հիվանդությունների նեղ մասնագիտական ծառայությունների մատուցման տեսանկյունից: Նման կենտրոնները նպաստում են, որպեսզի պացիենտների բուժօգնությունը կազմակերպվի ավելի արագ, որակյալ և հասանելի»,- կենտրոնի բացման ժամանակ իր խոսքում նշեց նախարար Արսեն Թորոսյանը:
Իսկ ավելի ուշ, նախարարը ֆեյսբուքյան իր էջում գրառում կատարեց՝ տեղեկացնելով «Բեսթ Լայֆ» հայ-ճապոնական բժշկական կենտրոնում սրտի ստենտավորման գների համեմատաբար մատչելի լինելու մասին.
«Սրտի ստենտավորման գները շարունակում են իջնել։ Այսօր արդեն ունենք 800.000 դրամ գին՝ 1 դեղապատ ստենտի համար նորաբաց Բեսթ-Լայֆ հայ-ճապոնական կենտրոնում։ 2018թ-ի մայիսին 1.1 մլն դրամից ավելի մատչելի գին չունեինք։ Գների անկման, ինչպես նաև պետական լայնածավալ ծրագրերի շնորհիվ գրեթե դադարել է սրտի վիրահատությունների համար հարևան Վրաստան մեկնելը։
Պետական ծրագրերի ընդլայնումը շարունակական է լինելու, բայց խնդրում եմ միշտ հիշել՝ «ամենալավ բուժումը կանխարգելումն է»։
Դիտեք նաև՝ Հայաստանի իրողության մեջ սա նոր տեսակի բժշկական կենտրոն է լինելու. Կարեն Համբարձումյան
Արսեն Թորոսյանը ներկա է գտնվել «Բեսթ Լայֆ» հայ-ճապոնական կենտրոնի բացմանը
