«Մի փոքր անսպասելի էր ադրբեջանական կողմի համար մեր կողմից խաղաղության համաձայնագիրը ստորագրելու առաջարկը և այդ տրամաբանության մեջ առաջ շարժվելը: Երևի դրա հետ է պայմանավորված վերջին շրջանի կրակոցների վերաբերյալ իրենց ապատեղեկատվությունը»,- ճեպազրույցի ժամանակ ասել է ԱԺ նախագահ Ալեն Սիմոնյանը՝ ընդգծելով, որ կրակոցների մասին ադրբեջանական կողմի ապատեղեկատվություններն առանձին հետաքննության թեմա են: Շարունակելով՝ նշել է. «Այս պայմանագրի քննարկման նպատակը եղել է արդյունքի հասնելը, ոչ թե խոսակցությունը հավերժ շարունակելը»:

***

«Պայմանականորեն եթե դիմացինը վատ բան է անում, նշանակում է մենք է՞լ վատը անենք: Մենք մեր դիրքն ունենք, տեսեք ինչքան ազատ են մեր լրատվամիջոցները, իսկ օրինակ՝ Ադրբեջանում խոսքի ազատությունն այս աստիճանի չէ»,- ճեպազրուցի ժամանակ ասել է ԱԺ նախագահ Ալեն Սիմոնյանը և, պատասխանելով լրագրողի հարցին, թե այդ վարկանիշը Հայաստանին ի՞նչ է բերելու, ի՞նչ է շահում ՀՀ-ն միջազգային հարթակներում, նշել է. «Անվտանգություն է շահում ՀՀ-ն: Որ եվրոդիտորդները գալիս են և սահմանում անց են կացնում հսկողություն, որ միջազգային զեկույցներ ենք ունենում, որ ՀՀ-ին օգնություն է տրամադրվում, համագործակցություն է տեղի ունենում, բա այդ ամեն ինչը դրա հաշվին է տեղի ունենում, կարող ա՞ մեր դուդուկի, ծիրանի և մեր սիրուն հայի աչքերի համար է տեղի ունենում: Հետո էլ բողոքում եք, ասում եք՝ մեզ վրա հարձակվեցին, աշխարհը ձայն չհանեց: Բա պատմության ընթացքում սխալ ենք մեզ պահել ինչ-որ հարցերում, հիմա ճիշտ ենք մեզ պահում՝ եվրոպական ընտանիքի, մարդու իրավունքների արժեքների, խոսքի ազատության արժեքների տրամաբանության մեջ ենք պահում»:

«Ինչպե՞ս եք վերաբերվում Անդրանիկ Քոչարյանի դրսևորած վարքին՝ լրագրողին վիրավորելու հետ կապված, պատրաստվո՞ւմ եք քննություն սկսել նրա վարքի հետ կապված» հարցին՝ ԱԺ նախագահ Ալեն Սիմոնյանը պատասխանեց. «Շատ վատ: Ես հենց այդ միջադեպին ծանոթացել եմ, զանգահարել եմ իրեն, ուզեցել եմ հասկանալ, թե ինչ է տեղի ունեցել»: Սիմոնյանը նշեց, որ մի քանի դրվագ է եղել, որոնք հանրությանը և լրագրողներին դուր չեն եկել, ինքը ներողություն է խնդրել և համարում է, որ դրանով էլ ավելի է ուժեղացել: