Այսօր Արարատ քաղաքում քարոզարշավի ընթացքում ՀՀ վարչապետի պաշտոնակատար, «Իմ քայլը» դաշինքի ցուցակը գլխավորող Նիկոլ Փաշինյանը նշեց.
«Մեզ այսօր փորձում են մեղադրել Արցախի դեմ ինչ-որ դավադրություններում ներգրավված լինելու համար: Ես հասկանում եմ նաև նախընտրական տրամաբանությունը, բայց երբ նման լուրջ մեղադրանքներ են ներկայացնում, դա արդեն միայն քաղաքական հարթակում քննարկելու հարց չէ: Այո, այդ մարդիկ պետք է գնան և համապատասխան մարմիններին տան բացատրություններ: Ասում են՝ այս հեղափոխությունը դավադրություն է Արցախի ու Հայաստանի դեմ, պետք է պատասխան տան, թե դա ինչ դավադրություն է: Իհարկե դա սուտ է, որովհետև հեղափոխությունն արել է ժողովուրդը և նման մեղադրանք ներկայացնողը նման դավադրության մեջ մեղադրում է ամբողջ ժողովրդին: Բա մի կառավարություն, ասենք էդքան տուպոյ եղավ, գնաց ինչ-որ դավադրությունների մեջ մտավ, բա հետո հետ չի գալո՞ւ»,- հայտարարեց Փաշինյանը և դիմեց նախորդ իշխանություններին.
«Իրենք իրենց խառնում են ուրիշների հետ: Էդ դուք եք, որ երբ գնացել եք բանակցությունների, մտածել եք՝ բա մեր Բրյուսելի բիզնեսի վերջն ինչ է լինելու, Մոսկվայի բիզնեսի վերջն ինչ է լինելու, ԱՄՆ-ում մեր անշարժ գույքի վիճակն ինչ է լինելու»:
Կարդացեք նաև՝ Ոգևորող տեղեկատվություն կա. Փաշինյանը՝ հայ-ադրբեջանական սահմանի մասին