«Նախ անդրադառնամ այն թեմային, թե արդյոք բացառում եմ այն իրավիճակը, ինչպիսին եղավ 2013 թվականին, երբ Հայաստանը մեկ կամ երկու գիշերում հրաժարվեց ԵՄ-ի հետ Ասոցացման համաձայնագիր ստորագրելու արդեն պայմանավորված գործընթացից և որոշում կայացրեց ԵԱՏՄ-ի կամ Մաքսային միության ուղղությամբ գնալ։ Հարցին պատասխանեմ կարճ և կոնկրետ՝ այո, բացառում եմ»։ Այս մասին Եվրոպական հանձնաժողովի նախագահ Ուրսուլա ֆոն դեր Լայենի հետ համատեղ ասուլիսի ժամանակ հայտարարել է վարչապետ Նիկոլ Փաշինյանը։

«Դա հնարավոր չէ, առավել ևս հիմա, երբ ՀՀ ժողովուրդը հստակ աջակցություն է հայտնել այն քաղաքականություններին, որ վարում է ՀՀ-ն, և մասնավորապես՝ բալանսավորված և բալանսավորման արտաքին քաղաքականությանը։ Մյուս կողմից, ինչպես հայտարարել ենք, մենք խնդիր երբեք չենք դրել, չունենք և չենք դնի ճգնաժամ ստեղծել Հայաստանի Հանրապետության և Ռուսաստանի Դաշնության հարաբերություններում։ Մենք գործում ենք մեր երկրի շահերի շրջանակներում, և, բնականաբար, մենք ոչ մի միջազգային գործընկերոջ շահերը չենք արհամարհում։ Բայց, մյուս կողմից, որևէ այլ գործընկերոջ շահերը չենք կարող ավելի բարձր դասել, քան ՀՀ-ի շահերը, և սա, կարծում եմ, տրամաբանական է ցանկացած երկրի համար։ Ինչ վերաբերում է ՌԴ-ի կառավարության ղեկավարի հետ երեկվա հեռախոսազրույցին, ապա իր նախաձեռնությամբ է այն տեղի ունեցել։ Հարցերի քննարկման շրջանակը հաղորդագրության մեջ ներկայացված է։ Պայմանավորվել ենք, որ առաջիկայում ավելի մանրամասն քննարկումներ կունենանք»,- ասել է նա։

Համատեղ ասուլիսն ամբողջությամբ՝ տեսանյութում