«Քո ուղերձը, քո տաղանդը, կազմակերպածը, ինչ եմ ուզում ասեմ՝ ոչ մեկին ոչ վիրավորում ես, ոչ բան, բայց նա վիրավորելով, խոսքերով առաջ գնաց, ժողովրդի աչքերը փակում էր»,- դիմելով Բագրատ Սրբազանին՝ ասաց Սպիտակի բնակչուհին։ Նա հաջողություն մաղթեց Սրբազանի գլխավորած շարժմանը։

Հիշեցնենք՝ «Տավուշը հանուն հայրենիքի» շարժման ավտոերթը շարժվում է դեպի Վանաձոր, որտեղ ժամը 16։00-ին հանրահավաք է նախատեսված։

Ապարանցիները դիմավորեցին Բագրատ Սրբազանին և միասին այցելեցին Ապարանի Սուրբ Խաչ եկեղեցի։ «Մի բան պատմեմ ու շարժվենք Վանաձոր»,- ասաց Սրբազանը․ «1996 թվականն էր, շաբաթը մեկ դասի էին գալիս, վերադառնում։ Մի օր հիվանդացել էի, չեկա։ Երեկոյան մեր հոգևորականները եկան, 07-ի բեռնախցիկը բացեցին, ինչ ասես կար՝ լավաշ, հաց, կաթ, մածուն, թթվասեր։ Ասացի՝ էս ի՞նչ է, պատասխանեցին՝ ժողովուրդն իմանացավ վատառողջ ես, լրիվ ուղարկեց։ Էդ ժամանակ էլ սնունդ գրեթե չկար։ Պետք է ծնկած ծառայել այս ժողովրդին»,- նշեց նա։

Բագրատ Սրբազանը 2002-2003թթ․ եղել է Արագածոտնի թեմի առաջնորդական տեղապահը։

ԱԺԲ-ն ֆեյսբուքյան էջում հայտնում է․ «Ոստիկանությունը, ինչպես միշտ, խոչընդոտում է ավտոերթի ընթացքը: Անհեթեթ պատճառաբանությամբ արձանագրություն են կազմում Վանաձոր մեկնող Բևեռի աջակիցների նկատմամբ»։

Ավտոերթից առաջ պատասխանելով լրագրողի՝ ի՞նչ տրամադրությամբ եք մեկնում Վանաձոր հարցին, Բագրատ Սրբազանն ասաց․ «Մի քիչ խառն եմ տրամադրությամբ, որովհետև Վանաձորի քաղաքապետն այսօր կալանքի տակ է գտնվում։ Բնականաբար, ցանկալի կլիներ իրեն ազատության մեջ տեսնել։ Այդուհանդերձ բարձր տրամադրություն կա՝ հանդիպելու մեր սիրելի լոռեցիներին։

Վերջին աղետի հետ կապված նաև մեզ համար կարևոր է տեղում իմանալ՝ ինչ խնդիրներ են լուծվել, ինչ՝ չէ»։

***

***