Աշխարհահռչակ ֆրանսիացի դերասանուհի Բրիժիտ Բարդոն, ով բնապահպանական ու կենդանիների պաշտպանությանն ուղղված ակտիվ գործունեություն է ծավալում և ստեղծել ու ղեկավարում է իր անունով կոչվող հիմնադրամը, գրառում է կատարել Հայաստանի մասին` մասնավորապես նշելով. «Մի քանի ժամից Մաշա և Միշա արջերը կլքեն իրենց ճաղավանդակները և կհայտնվեն վայրի բնության գրկում։ Սա հնարավորություն ու հույս է բոլոր վայրի կենդանիների համար, որոնք անարդարացիորեն հայտնվել են ճաղավանդակների ներսում՝ անազատության մեջ։ Մեր հիմնադրամները, ստանալով Բնապահպանության նախարարության աջակցությունը, համագործակցել և հասել են այն մեծ արդյունքին, որն ունենք այժմ։ Հայաստանն այժմ վառ օրինակ է մի առաջադեմ երկրի, որը հարգանքով է վերաբերվում կենդանիներին։ Բռավո։ Մերսի»:
Նշենք, որ Գյումրիի կենդանաբանական այգու արջերը` Մաշան և Միշան մարտի 23-ին տեղափոխվելու են Ռումինիա` Վայրի բնության ու մշակութային արժեքների պահպանման հիմնադրամը (FPWC)՝ Բրիժիտ Բարդո հիմնադրամի և ՀՀ բնապահպանության նախարարության աջակցությամբ:
Ռումինիայում գտնվող «Լիբեարտի» արջերի մասնագիտացված ապաստարանը միջազգային չափանիշներին համապատասխանող, մի քանի հեկտար տարածությամբ փակ գոտի է՝ նախատեսված առողջական ու հոգեբանական խնդիրներ ունեցող արջերի կացության համար։
