Հայ գրականության մեծագույն դեմքերից մեկի՝ դրամատուրգ ու փայլուն երգիծաբան Հակոբ Պարոնյանի ամենահայտնի գործերից մեկը՝ «Մեծապատիվ մուրացկանները» նոյեմբերի 28-ին կբեմադրվի Գ.Սունդուկյանի անվան ազգային ակադեմիական թատրոնում:
Երաժշտական կատակերգությունը բաղկացած է երկու մասից: Բեմադրության հեղինակը ՀՀ ժողովրդական արտիստ Արմեն Էլբակյանն է, կոմպոզիտորը՝ Ստեփան Լուսիկյանը:
«Սա անմահ ստեղծագործություն է, որը բոլոր ժամանակներում արդիական է: Ներկայացման մեջ փորձել ենք շեշտել այն կարևորը, որը համահունչ է մեր ժամանակին: Ընդգրկված է հզոր դերասանական խումբ» ,-լրագրողների հետ հանդիպման ժամանակ ասաց Արմեն Էլբակյանը:
Նշենք, որ Աբիսողոմ աղայի դերում հանդես կգա Ալբերտ Սաֆարյանը, Մանուկ աղայի դերում՝ Հարություն Մովսիսյանը, Շողակաթի դերում՝ Աննա Էլբակյանը:
Ալբերտ Սաֆարյանի խոսքով՝ ներկայացման մեջ շեշտադրումը հենց փառքի վրա է՝ բոլորի ամենացավոտ կողմը:
«Ծանոթ մարդկանց կհանդիպեք՝ գուցե ազգանվան տարբերությամբ»,-նկատեց Ալբերտ Սաֆարյանը:
Անի Կարապետյան