«Դուք հեռու կանգնեք և մի խանգարեք ձեր գործընկերներին»,- ճեպազրույցի ժամանակ, դիմելով լրագրող Հռիփսիմե Ջեբեջյանին, ասաց ՔՊ-ական պատգամավոր Անդրանիկ Քոչարյանը․ «Դուք միշտ ինձ խանգարում եք։ Ես առաջնորդվում եմ հոգևորականի էն առաջարկով, որ ձեզ արեց՝ մաքրեք ձեր շրթունքները»,- շարունակեց Քոչարյանը։ «Էս ի՞նչ բուլինգ է, իսկ միգուցե հոգևորականին ցիտելիս կոնտեքստն էլ ցիտեք»,- պատասխանեց լրագրողը՝ պահանջելով իրենից ներողություն խնդրել․ «Ձեր պահվածքը ոչ տղամարդկային է, ոչ մարդկային և ոչ պաշտոնյայի, ձեր պահվածքը անթույլատրելի է»։ «Ներողություն չեմ խնդրի»,- պատասխանեց Քոչարյանը։
Հիշեցնենք, որ Հռիփսիմե Ջեբեջյանը ամիսներ առաջ Բագրատ Սրբազանի հետ զրույցում հետաքրքվել էր, թե ինչպե՞ս է վերաբերվում հայտնի դեմքերի՝ իր մասին ծաղրական գրառումներին, օրինակ դերասան Հովհաննես Ազոյանին, ով նրան «շրջիկ տերտեր-թամադա» էր անվանել․ «Դա ո՞վ ա, լավ էլի Հռիփսիմե, գնա շրթունքներդ լվա. սատանաների անուններ մի տվեք»,- պատասխանել էր Բագրատ Սրբազանը:

Լրագրող Հակոբ Կարապետյանի ֆեյսբուքյան գրառումը․ «Ոչ մի հույս չունեմ, որ ՔՊ-ական պատգամավորները դատապարտելու են Անդրանիկ Քոչարյանի էսօրվա լպիրշ պահվածքը կին լրագրողի հետ շփման ընթացքում։ Չունեմ, որովհետև նրանք այդ պատգամավորի (և ուրիշների) նույնքան լպիրշ պահվածքին չեն անդրադարձել նախկինում էլ։
Իսկապես, չգիտեմ, թե ինչպես կարելի է պատժել (կամ զսպել) սանձարձակ պաշտոնյաներին, միակ բանը, որ մտքովս անցնում է՝ նմանների հանդեպ տոտալ բոյկոտն է։ Խնդրում եմ լրագրող ընկերներիս, բոյկոտեք Քոչարյանին ու նրա նմաններին, մի՛ լուսաբանեք նրա ասածները, հարցեր մի՛ տվեք նրան, անտեսեք, արհամարհեք, թող մնան իրենց քարոզչական պատի թերթերի հույսին։ Միայն էդպես մենք կարող ենք ազդել ամբարտավան պաշտոնյաների վարքի վրա»։

***

Իրավապաշտպան Ժաննա Ալեքսանյանի ֆեյսբուքյան գրառումը. «Խիստ դատապարտելի է Ազգային Ժողովում Անդրանիկ Քոչարյանի վիրավորական պահվածքը լրագրող Հռիփսիմե Ջեբեջյանի նկատմամբ։ Նա վիրավորեց Հռիփսիմե Ջեբեջյանին ոչ միայն որպես լրագրողի, այլև որպես կնոջ։ Ինչպե՞ս եք խոսում լրագրողի հետ․ այս հարցին պաշտոնյան պատասխանեց․ «լրագրողի չէ, տիկին Ջեբեջյանին»։ Եթե լրագրող չէ Ջեբեջյանը, ապա ի՞նչ գործ ունի ԱԺ-ում։ Եթե լրագրող չէ, ի՞նչ իրավունքով եք վիրավորական տոնով խոսում տիկին Ջեբեջյանի հետ՝ այն էլ տեախցիկների առջև։ Անդրանիկ Քոչարյանը պետք է բացատրություններ տա և ներողություն խնդրի լրագրողից նման պահվածքի համար։ Ինձ շատ զարմացրեց նաև լրագրող գործընկերների անտարբերությունը իրենց գործընկերոջ նկատմամբ, որևէ կերպ չարձագանքեցին, չընդվզեցին չսատարեցին Հռիփսիմեին։ Շարունակեցին հարցեր տալ, կարծես ոչինչ տեղի չի ունեցել։ Այդ ի՞նչ պատասխան էիք ակնկալում հենց նոր ձեր գործընկերոջը վիրավորած պաշտոնյայից, որն ավելի թանկ էր, քան ձեր շարքից հեռացված ու հուզված ձեր գործընկերը»։