Թարմացված. «Արմեն Աշոտյանն ինչով էր վտանգավո՞ր. ինչի նրանից ավելի լավ ու արդյունավետ ո՞վ էր պայթեցնում սրանց հակապետական, հակահայկական, տգետ քաղաքականության փուչիկը»,- ՔԿ շենքի մոտ, լրագրողների հետ զրույցում, անդրադառնալով ՀՀԿ փոխնախագահ Արմեն Աշոտյանի ձերբակալությանը, ասել է ՀՀԿ Գործադիր մարմնի անդամ Էդուարդ Շարմազանովը։ «Արմենի ու Արմենի նմանների գործունեության արդյունքում է Փաշինյանի ռեյտինգը 94 տոկոսից իջել 14 տոկոս: Իհարկե՛ Արմենը վտանգ է ներկայացնում»,- նշել է Շարմազանովը: «Փողերի լվացումը կպցրին, հիմա էլ կարող է Քենեդու սպանությունը կպցնեն՝ փորձելով հանրության ուշադրությունը շեղել: Սա խոսում է Նիկոլի վախերի մասին. ռեժիմը խուճապի մեջ է»,- հավելել է նա:

Թարմացված․«Չեմ հասկանում՝ Արմեն Աշոտյանին ի՞նչ կարիք կար էսօր ձերբակալելու, դա երկրին ի՞նչ ա տալու՝ բացի վնասից... Էս իշխանությունն էլ է անցնելու, հաջորդն էլ է անցնելու, բայց երկիրը մնալու է: Եկեք նենց անենք, որ պատմության դասագրքերում մեր մասին մի երկու լավ տող գրվի»,- ԱԺ-ում հայտարարեց «Հայաստան» խմբակցության պատգամավոր Գեղամ Նազարյանը՝ անդրադառնալով ՀՀԿ փոխնախագահ Արմեն Աշոտյանի ձերբակալությանը:

Թարմացված․Փաստաբան Տիգրան Աթանեսյանի ֆեյսբուքյան գրառումը. «Արմեն Աշոտյանը օգտվել է լռության իրավունքից՝ պնդելով նախկինում նույն գործով որպես վկա տված իր ցուցմունքները:
Արմեն Աշոտյանից վերցվել է նրա կենսաչափական անձնագիրը՝ օտարերկրյա վիզաներով»:

Ավելի վաղ Աթանեսյանը հայտնել էր, որ Աշոտյանին ձերբակալել են 24 ժամով: «Նա իրեն մեղավոր չի ճանաչում, այս ամենը համարում է բացահայտ և ցինիկ քաղաքական հետապնդում»,- նշել էր փաստաբանը

Թարմացված․ ԱԺ նախկին պատգամավոր Նաիրա Զոհրաբյանի ֆեյսբուքյան գրառումը. «Այս պահին Արմեն Աշոտյանը տարվել է Քննչական կոմիտե։ Արմեն Աշոտյանին ձերբակալում են։
Այս բացահայտ քաղաքական հետապնդման մասին անմիջապես տեղյակ եմ պահել միջազգային իմ գործընկերներին։ Ուզում եք՝ բոլորիս ձերբակալեք։ Դուք պարտվել եք հայ ժողովրդին ու դուք չեք մարսելու։ Սա բացահայտ քաղաքական հետապնդում է»: