a1plus.am-ը գրում է.Երեւանի  Կենտրոն եւ Նորք-Մարաշ վարչական շրջանների ընդհանուր իրավասության դատարանում այսօր արդեն երկրորդ անգամ դեռ չսկսված հետաձգվեց  նոյեմբերի 25-ին Մարաշում վնասազերծված զինված խմբի գործով դատական նիստը:  Գործով ամբաստանյալ Վահան Շիրխանյանը չէր ներկայացվել դատարան:

Դատավոր Արմեն Բեկթաշյանը ընթերցեց  «Երեւան-Կենտրոն» ՔԿՀ-ից դատարան ուղարկված  գրությունը, ըստ որի Վահան Շիրխանյանը հրաժարվել է դուրս գալ եւ մասնակցել դատական նիստին:

Դատարան էր ներկայացվել ՔԿՀ բժշկի գրությունը, ըստ որի առողջական վիճակը բավարար է, եւ պատգարակով մասնակցելու անհրաժեշտություն չեն տեսնում: Մինչդեռ Վահան Շիրխանյանն էլ դատարանին տեղեկացրել էր, որ առողջական վիճակով պայմանավորված  միայն պատգարակով եւ պառկած վիճակում կարող է մասնակցել դատական նիստերին:

Պաշտպան Հայկ Ալումյանն էլ դատարանին տեղեկացրեց, որ նույն բժիշկը իր պաշտպանյալին նշանակել է անկողնային ռեժիմ եւ տրված տեղեկատվությունը կեղծ է:

Փաստաբան Ինեսա Պետրոսյանն էլ  ավելացրեց, որ  դատական նիստերը  արհեստականորեն հետաձգվում են եւ խախտվում է մյուս ամբաստանյալների արդար դատաքննության իրավունքը: «Կարող էին Շտապ օգնություն հրավիրել եւ պատգարակով բերել»:

Քանի որ առանց Վահան Շիրխանյանի նիստը չէր կարող շարունակվել, դատավոր Արմեն Բեկթաշյանը  այն հետաձգեց մինչեւ հունվարի 20-ը:

Զինված խմբի պարագլուխ ներկայացվող Արթուր Վարդանյանը մինչ դահլիճից հեռանալը, հայտարարեց.  «Այս  դատարանը բառիս բուն իմաստով շոու է, շոու բիզնես են սարքել: Ինչքան ուզեն փորձեն մեզ ոչնչացնել՝ չի՛ ստացվելու»:

Մանրամասները՝ սկզբնաղբյուր կայքում