Այսօր լրագրողների հետ է հանդիպել «Սոցիոմետր» անկախ սոցիոլոգիական կենտրոնի տնօրեն Ահարոն Ադիբեկյանը: Նա խոսել է Երևանի ավագանու առաջիկա ընտրությունների և դրա հնարավոր արդյունքների մասին: Ըստ սոցիոլոգի` այս ընտրություններից շատ բան է կախված: Եթե, օրինակ ՀՀԿ-ն պարտվի այս ընտրություններում, լուրջ կասկածներ կլինեն նախագահի ընտրությունների արդյունքների նկատմամբ: Իսկ եթե հավասարակշռությունը նույնը մնա, ապա Րաֆֆի Հովհաննիսյանի և ընդդիմության հավակնություններն անհիմն են:  

Նրա կարծիքով` Տարոն Մարգարյանը վերընտրվելու բոլոր հնարավորություններն ունի. հարցումները ցույց են տվել, որ երևանցիների 63 տոկոսը բարձր է գնահատում Տարոն Մարգարյանի գործունեությունը, բացի այդ Մարգարյանը հմայիչ տղամարդ է, ինչը կանանց համար կարևոր է, իսկ ընտրողների կեսից ավելին կանայք են: