Դիտեք նաև՝
Այսօր քանդակագործ Ալիս Մելիքյանի ծննդյան օրն է՝ 96 ամյակը։ Ալիս Մելիքյանը ծնվել է Ֆրանսիայում, 1936 թվականի մայիսին ծնողների և քրոջ հետ հայրենադարձվել է Հայաստան, իսկ ներկայումս ապրում է Լոս Անջելեսում։
Հայտնի շատ քանդակների հեղինակ է Ալիս Մելիքյանը, իսկ անցած տարի, Շառլ Ազնավուրի ծննդյան օրվա առթիվ, մայիսի 22-ին Փարիզում տեղադրված կիսանդրին նույնպես հանրահայտ քանդակագործի աշխատանքն է:
Ալիս Մելիքյանի թոռը՝ նկարիչ, քանդակագործ Էդուարդ Վանեսքեհյանը տաղանդավոր տատիկ-պապիկների մշակութային ավանդույթների շարունակողն է։
Ֆրանսիայի ապահով կյանքը թողած՝ ապրում է Հայաստանում և օրերս սարսափելի տխուր իրականության հետ է բախվել, որի վերաբերյալ վաղը, 15.00-ին, Մեդիա Կենտրոնում ասուլիսին են տալու նրա փաստաբանները։
Ոստիկանության Արաբկիրի բաժնում Ֆրանսիայի Հանրապետության քաղաքացի նկարիչ, քանդակագործ Էդուարդ Վանեսքեհյանը խոշտանգման է ենթարկվել, ինչի արդյունքում ստացել է մարմնական լուրջ վնասվածքներ:
Մամուլն այս մասին օրերս գրել էր ու , մասնավորապես, «Փաստ» օրաթերթը նշել էր․
«Սկանդալային միջադեպ է տեղի ունեցել պարեկային ծառայության ներկայացուցիչների մասնակցությամբ, ովքեր ձեռնաշղթայել և բերման են ենթարկել հենաշարժողական համակարգի լրջագույն խնդիրներ ունեցող և անհապաղ վիրահատության նախապատրաստվող արվեստագետին, որն իր տան դիմաց՝ կնոջ և անչափահաս երեխայի ներկայությամբ, իբրև թե ծեծի է ենթարկել չորս-հինգ ոստիկանի՝ բռնություն գործադրելով նրանց նկատմամբ:
Սակայն սա Ֆրանսիայի Հանրապետության քաղաքացի, նկարիչ և քանդակագործ Էդուարդ Վանեսքեհյանի հետ կատարվածի հետ կապված ամբողջ պատմությունը չէ: Ըստ տեղեկությունների, ձեռնաշղթայված քաղաքացին ոստիկանության Արաբկիրի բաժնում արժանացել է չափազանց «ջերմ» վերաբերմունքի և արդյունքում ստացել է բավականին լուրջ մարմնական վնասվածքներ: Այս ամենը բավական չէ, հիմա էլ Քննչական կոմիտեում գործ է «կարվում»՝ ձեռնափայտով տեղաշարժվող արվեստագետին մեղադրելով ոստիկանների նկատմամբ բռնություն գործադրելու մեջ»:
Asekose.am-ը կհետևի այս թեմային և վաղը կներկայացնենք նոր մանրամասներ։