Արտերկրում Հայաստանը ներկայացնող դիվանագիտական կորպուսի ներկայացուցիչներն, օրերս, Գյումրիում էին: Դիվանագետների ամենամյա հավաքի ձևաչափն այս տարի փոխվել էր և Արտաքին գործերի ու Տարածքային կառավարման ու զարգացման նախարարությունների նախաձեռնությամբ առաջին անգամ դիվանագետների հավաքի մեկ օրն անցկացվեց Գյումրիում:
Այս ձևաչափն ընտրվել էր մեկ նպատակով՝ դեսպաններին ներկայացնել մարզերի հնարավորությունները, որպեսզի վերջիններս դրսում ներդրողներ գտնեն ու ուղղորդեն Հայաստանի մարզեր:
Տարածքային կառավարման նախարար Սուրեն Պապիկյանն իր ելույթում անդրադարձել է ազատ տնտեսական գոտուն: Նախարարը տեղեկացրել է, որ Մեղրու ազատ տնտեսական գոտու տարածքների հետ կապված վեճը հասել է դատարան:
«Մեղրիում խնդիրներ կային կապված տարածքների հետ, հիմա մենք արդեն դիմել ենք դատարան, դատարանն ընդունել է վարույթ, հիմա դատարանում նիստերի արդյունքում կունենանք, կտեսնենք ինչ ընթացք է ունենում Մեղրիի ազատ տնտեսական գոտին, որովհետև երկիրը չի կարող իրեն թույլ տալ ունենալ տասնյակ ազատ տնտեսական գոտիներ։ Ուղղակի Շիրակի մարզը, Գյումրիի տարածաշրջանը և վերջին իրադարձությունները և մենք հյուսիսային մաքսակետ ենք հիմնում, թույլ է տալիս, որ մենք ունենանք նաև հյուսիսիում, ինչպես ունենում ենք հարավում, նաև հյուսիսում նմանատիպ հնարավորություն ստեղծել», - ասել է Պապիկյանը։
Ըստ Պապիկյանի, մարզերի համաչափ զարգացումը կառավարության համար օրակարգային խնդիր է. դրա համար 23,7 մլրդ դրամի սուբվենցիոն ծրագրեր են իրականացնում մարզերում: Նպատակը ներդրողներին դեպի մարզեր ուղղորդելն է, և հենց դիվանագետներն էլ կարող են կապող օղակը հանդիսանալ:
