«Փաստերի ստուգման հարթակը» դիտարկել է ԱԺ «Քաղաքացիական պայմանագիր» խմբակցության ղեկավար Հայկ Կոնջորյանի ու նրա կնոջ՝ Շուշանիկ Ալեքսանյանի կողմից Կոռուպցիայի կանխարգելման հանձնաժողով ներկայացված՝ 2022 և 2023 թվականների գույքի ու եկամուտների հայտարարագրերը։
Ըստ 2022 և 2023 թվականների հայտարարագրերի, համատեղ սեփականության իրավունքով Հայկ Կոնջորյանին է պատկանում 2018-ին գնված բնակարան՝ Նոր Նորք վարչական շրջանում։
2022 թվականի հայտարարագրի համաձայն, որպես տրանսպորտային միջոց, տարեսկզբում նշվում է 2012 թվականի արտադրության HYUNDAI մակնիշի ավտոմեքենա, որը ձեռք էր բերվել 2018 թվականին։ Ավելի ուշ՝ 2022-ին, պատգամավորը այն վաճառել է 3 մլն դրամով և 9 մլն դրամով ձեռք է բերել 2017 թվականի արտադրության TOYOTA մակնիշի ավտոմեքենա։
Ե՛վ 2022 թվականի, և՛ 2023 թվականի տարվա վերջում, որպես առկա տրանսպորտի միջոց, պատգամավորը հայտարարագրել է 2017 թվականի արտադրության TOYOTA մակնիշի ավտոմեքենան։
Հաշվետու տարվա եկամուտների բաժնում Կոնջորյանը, որպես եկամտի տեսակ, ներկայացրել է ԱԺ-ից ստացված աշխատավարձը․ 2022-ին՝ 7 մլն 868,990 դրամ, 2023-ին՝ 9 մլն 950,080 դրամ։
2022-ի տարեվերջի դրությամբ Կոնջորյանի բանկային հաշիվներին եղել է շուրջ 738 հազար դրամ, «Իդրամ» էլեկտրոնային հաշվին՝ 20 դրամ։ 2023-ի տարեվերջի դրությամբ բանկային հաշիվներին եղել է 1 մլն դրամ գումար, էլեկտրոնային հաշվին՝ 2777 դրամ։
Իշխանական պատգամավորի կանխիկ գումարը 2022-ի տարեվերջին եղել է 1․5 մլն դրամ, իսկ արդեն 2023 թվականի տարեվերջին այն կրկնակի ավելացել է՝ 3 մլն դրամ։
2022 թվականի հայտարարագրի մեջ հաշվետու տարվա դեկտեմբերի 31-ի դրությամբ վարկի մայր գումարի մնացորդի չափը կազմել է 916,388 դրամ, իսկ 2023-ին այն զգալի նվազել է՝ կազմելով՝ 290,559 դրամ։
Հայկ Կոնջորյանի կնոջ՝ Շուշան Ալեքսանյանի 2022 թվականի հայտարարագրի համաձայն, տարեվերջին նրա բանկային հաշիվներից երկուսին եղել է շուրջ 232 հազար դրամ, իսկ մյուսին՝ 906,443 դրամ գումար։ Պատգամավորի կինը նաև կրիպտոարժույթի տնօրինող է, և նրա էլեկտրոնային հաշիվներին եղել է կրիպտոարժույթ ripple՝ 3400 դրամ, կրիպտոարժույթ Ethereum՝ 52,420 դրամ»: Շուշան Ալեքսանյանը, որպես կանխիկ գումար, նշել էր 2 մլն 500,000 դրամ գումար։
2022-ի ընթացքում պատգամավորի կինը ստացել է շուրջ 11․7 մլն դրամի եկամուտ՝ իր աշխատավայրից՝ «Հայփոստից», ինչպես նաև ՊԵԿ-ից։
Շուշան Ալեքսանյանը 2022-ի վերջում ունեցել է 18․8 մլն դրամի վարկեր, որոնցից մեկը՝ հիպոթեքային։
2023 թվականի հայտարարագրի համաձայն, 2023-ի վերջին Շուշան Ալեքսանյանի բանկային հաշիվներին եղել է 10․3 մլն դրամ, 313 դրամ և 1․1 մլն դրամ գումար, էլեկտրոնային հաշիվներին (HayPost Pay)՝ 429 դրամ, կրիպտոարժույթ ripple՝ 0 դրամ, կրիպտոարժույթ Ethereum՝ 13,725 դրամ և կանխիկ՝ 4,500,000։
Ընդհանուր առմամբ, պատգամավորի կնոջ եկամուտները 2023-ի վերջում կազմել են 12,5 մլն դրամ։ Իսկ վարկային փոխառության գումարը 2023-ին զգալի նվազել է․ եթե 2022-ին այն կազմել էր 18․8 մլն դրամ, ապա 2023-ին այն եղել է 17․8 մլն դրամ։
Որպես անշարժ գույք, Շուշան Ալեքսանյանը և՛ 2022-ին, և՛ 2023-ին հայտարարագրել էր համատեղ սեփականության իրավունքով Նոր Նորքում գտնվող բնակարանը, շարժական գույք չէր նշել։
Պատգամավորն ու կինը ծախսեր չեն հայտարարագրել։
Այսպիսով, Հայկ Կոնջորյանի և նրա կնոջ 2022 և 2023 թվականի հայտարարագրերում անշարժ և շարժական գույքի վերաբերյալ տարվա վերջում առկա տվյալները նույնն են։ 2022 թվականի համեմատ 2023-ին աճել են պատգամավորի ու նրա ընտանիքի անդամի եկամուտները, հատկապես՝ կանխիկ գումարները։
