Համընդհանուր հայտարարագրման համակարգի ներդրմամբ չի նախատեսվում ՀՀ Հարկային օրենսդրության որևէ փոփոխություն կամ որևէ դրույքաչափի փոփոխություն։ Այս մասին ընթացող մամուլի ասուլիսի ժամանակ ասաց վարչապետ Նիկոլ Փաշինյանը․ «Այն ինչ օրենսդրությամբ պետք է հարկվեր համընդհանուր համակարգի ներդրումից առաջ, նույն կերպ կհարկվի ներդումից հետո։ Սոցիալապես խոցելի խավերի համար հայտարարագրումը որևէ պարագայում չի կարող լրացուցիչ հարկային կամ ֆինանսական բեռ ավելացնել։
Նույնիսկ նվազագույն աշխատավարձ ստացող քաղաքացին կարող է հետ ստանալ 100 000 դրամ»,- ասաց Փաշինյանը՝ ներկայացնելով հայտարարագրման համակարգի մանրամասները։

«Մեզ միշտ ինչ-որ վերացական բաներ են խանգարում, չեք կարծո՞ւմ որ խնդիրը ձեր մեջ է»,- ասուլիսի ժամանակ Փաշինյանին ուղղվեց այս հարցը, որին ի պատասխան նա ասաց․ «Այո, խնդիրը մեր մեջ է, մեր աշխարհընկալման մեջ է։ Նաև անձամբ իմ մեջ է խնդիրը, բայց իմ մեջի խնդիրը բոլորիս մեջ արտահայտվում է, որովհետև ես օդից չեմ ընկել»։

***

Վարչապետ Նիկոլ Փաշինյանը ասուլիսի ժամանակ, անդրադառնալով սահմանազատման գործընթացը հյուսիսից իրականացնելուն, ասաց, որ աշխատանքներն իրականցվելու են հանձնաժողովների կանոնակարգերով. «Ամեն ինչ տեղի է ունենալու դրա հիման վրա։ Մենք պատրաստակամ ենք։ Անկեղծ պետք է ասեմ, որ սահմանազատման պրոցեսը 2024 թվականին շատ առարկայացավ։ Մենք Ադրբեջանի հետ առաջին երկկողմ միջպետական թուղթն ունենք, որը երկու երկրների ընթացակարգերով անցել է և ամեն երկիր իր ընթացակարգով հաստատել է դա, ինչը շատ կարևոր ու անկյունաքարային նշանակություն ունի։ Արդեն պայմանավորվածություն է ձեռք բերվել, որ առաջիկա շրջանում հանձնաժողովները կենտրոնանալու են Վրաստանի սահմանից մինչև Իրանի սահման՝ ՀՀ-ի և Ադրբեջանի սահմանային աշխատանքներում»։
Անդրադառնալով Հայաստանի և Ադրբեջանի միջև խաղաղության պայմանագրին՝ Փաշինյանը նշեց, որ դեռևս երկու կետեր մնում են չհամաձայնեցված, Երևանն առաջարկել է լուծումներ երկուսի ուղղությամբ էլ: «Չհամաձայնեցված կետերից մեկը երրորդ երկրների ուժերի ներկայացուցիչներ սահմանի երկայնքով չտեղակայելուն է վերաբերում: Այս պարագայում Երևանն առաջարկում է դա կիրառել սահմանազատված հատվածների նկատմամբ:

Խնդիրը նաև միջազգային ատյաններից իրավական հայցերի հետ կանչելու թեման է, որը որոշակի հանգամանքներում և պայմաններում մեզ համար կարող է ընդունելի լինել: Գաղափարը հետևյալն է, որ մենք պետք է համոզվենք, որ ոչ միայն միջազգային ատյաններում ենք հետ կանչում, այլև այդ վեճերից հրաժարվում ենք ընդհանրապես, հակառակ դեպքում կարող է ստացվել իրավիճակ, որ մենք մի հայց հետ կանչեցինք, Ադրբեջանն էլ հետ կանչեց, բայց հաջորդ փուլում Ադրբեջանը երկկողմ հարաբերություններում այդ հարցերը դնի սեղանին, և դրա շուրջ կարող են լինել էսկալացիաներ», - ասաց Նիկոլ Փաշինյանը: