ASEKOSE.am-ի և ՄԵԳԱՊՈԼԻՍ ԱՄՍԱԳՐԻ հարցերին պատասխանում է հաղորդավարուհի Գոհար Գասպարյանը:
-Երևույթներ, որոնք խորթ են Գոհար Գասպարյանին:
-Ծխելը, վուլգար խոսքն ու հագուստը:
- Դժվար պահերին ո՞վ կամ ի՞նչն է Ձեզ ուժ տալիս:
-Իմ լավատեսությունը, ծնողներս և ընկերներս:
-Գոհարը հիասթափվո՞ւմ է և ե՞րբ:
-Այո, այն էլ ինչպես...Երբ ստում են և երբ անտարբեր են:
-Աշխարհը կործանումից կկանխեն....:
-Հարգանքն ու հանդուրժողականությունը միմյանց, կրոնների, մշակույթների, ռասսաների նկատմամբ:
- Նակամուրան իր ստեղծագործություններից մեկում գրում է` «Դատարկությունը նույնիսկ տեսնել հնարավոր չէ»: Դուք ինչպե՞ս
կմեկնաբանեք դատարկությունը և երբևէ «հայտնվե՞լ եք դրանում»:
-Դատարկությունը այցելում է հիասթափությունից հետո և այն հնարավոր է տեսնել աչքերի մեջ:
-Ինչի՞ց են առավել հաճախ Գոհար Գասպարյանի դեմքի մկանները հաճելիորեն լարվում:
-Եթե հաճելի է, ուրեմն չեն լարվում: Իսկ դեմքի ամեն մկանով կարող եմ ժպտալ հաղթանակներից՝ անձնական, ազգովի:
-Ի՞նչ ասեկոսեներ եք լսել Ձեր մասին, որոնք զայրացրել և զվարճացրել են Ձեզ:
-Իմ մասին ասեկոսեներ քիչ են լինում, որովհետև ես հնարավորինս փորձում եմ տեղիք չտալ: Բայց եթե, այնուամենայնիվ, դրանք առաջանում են որոշ բամբասողների շնորհիվ, դրանք կամ անտեսվում են, կամ էլ` կանխվում:
-«Երբեք պետք չէ թույլ տալ քեզ երկար ժամանակ զմայլվել հասարակության հաճոյախոսություններով: Այն սուֆլեի պես մի բան է. ժամանակի հետ կնստի»,- հաճոյախոսությունների վերաբերյալ նման կերպ է արտահայտվել տաղանադավոր դերասան Չարլի Չապլինը: Ինչպիսի՞ն է Ձեր վերաբերմունքը հաճոյախոսությունների հանդեպ և կկարողանաք հիշե՞լ Ձեզ ուղղված ամենատպավորիչ հաճոյախոսությունը:
-Երբ բացառիկ հարցազրույց ունեցա Ալեն Դելոնի հետ և լսեցի նրանից, որ գեղեցիկ եմ, այդքան չհուզվեցի, որքան այն պահին երբ նա ասաց, որ իրեն շատ դուր եկավ հարցազրույցը, և խնդրեց DVD-ն ուղարկել իրեն: Սա ինձ համար ամենաբարձր ու արժեքավոր հաճոյախոսությունն էր, որն, ինչպես ինքը նշեց, ուղղակի հաճոյախոսություն չէր, այլ` անկեղծ կարծիք:
-«Գտնված երազ» հաղորդման հաղորդավարուհին գտե՞լ է իր «երազը»:
-Չգիտեմ, գուցե այո, գուցե ոչ….կյանքը ցույց կտա:
-Իսկ նա հաճա՞խ է հայտնվում երազների աշխարհում:
-Ոչ այդքան հաճախ, բայց լավատես լինելս մեկ-մեկ տրանսֆորմացվում է երազելուն:
-Ձեր բնավորության ո՞ր գիծը կցանկանայիք նվիրել Ձեր թշնամուն:
-Ես թշնամի չունեմ, իսկ եթե ունենամ էլ, երբեք չեմ նվիրի նրան այն, ինչ իմն է:
-Սկզբունքներ, որոնցով առաջնորդվում եք:
-Հույս, հավատ, սեր:
-Ի՞նչ կցանկանայիք Ձմեռ պապիկից:
-Թողնում եմ Ձմեռ պապիկի հայեցողությանը (ժպտում է):
Հեղինակ` Անի Բեքիրյան
