Երաժշտական յուրօրինակ ու աննախադեպ նախագիծը՝ Project LA-ը հունիսի 15-ին իսկական տոն պարգևեց ճաշակով երաժշտություն սիրողներին ու իրական դաս տվեց շոու բիզնեսի ներկայացուցիչներին, թե ինչպե՞ս պետք է ստեղծագործել, ինչպե՞ս մատուցել ու ի՞նչ երգել։
Համերգի ավարտին ամբողջ դահլիճը կատարել է Project LA-ի հիթերից մեկը՝ գրված Չարենցի խոսքերով․ Ո՞վ կհանդիպի․․․
Համերգից հետո դահլիճում տիրող խանդավառությունը տեղափոխվել է համացանց։
Գոռ Սուջյանը՝ Project LA-ի մենակատարը ֆեյսբուքյան իր էջում գրել է․ «Աննկարագրելի էմոցիաներ վերապրեցի երեկ և դա Ձեր շնորհիվ է, սիրելի հանդիսատես : Յուրահատուկ սիրո մթնոլորտ էր ամբողջ դահլիճում ,նույնիսկ չէի ուզում, որ համերգը ավարտվեր : Շնորհավորում եմ Project LA-ի ամբողջ անձնակազմին ,իհարկե Լևոն Արևշատյանի գլխավորությամբ ... Լևոն ջան, Դուք, իրոք, պատմություն եք կերտում !!!!!»:
«Աննկարագրելի զգացողություն է, երբ երգում է հանդիսատեսը... Ուրեմն ամեն ինչ ճիշտ է արված, սրտանց ու որակով։ Բրավո Լևոն Արևշատյան , Project LA և անզուգական Գոռ Սուջյան, բրավո Սուրեն Սահակյան, Խաչիկ Սահակյան և Հայկ Գասպարյան ։ 2 ու կես ժամն անցավ աննկատ և հանդիսատեսն ու երաժիշտներն ամբողջ ընթացքում համակված էին նուրբ ու միաժամանակ հաստատուն սիրով, նվիրումով առ ազնիվ ու բարձրաճաշակ երաժշտություն ու պոեզիայի գոհարներ»,-համերգից հետո ֆեյսբուքյան իր էջում գրել է Արմինե Անտիկյանը։
Հրանուշ Կարապետյանն էլ ֆեյսբուքյան իր էջում գրել է․
«Վայելեք նոր հրաշքը: Չարենց ու իմ սրտի պրոյեկտ:
Այն ինչ անում է Լևոն Արևշատյանը, կոչվում է պատմություն, ժառանգություն, արժեհամակարգ, ազգային, համամարդկային արժեք: Ես ուզում եմ ասել, որ հերոսների մասին մեր կարծրացած պատկերացումները փնտրել ու գտնել է պետք մեր շրջապատի մարդկանց մեջ: Երեկ դահլիճում յուրաքանչյուրն էդպիսին էր: Մտածում էի դուրս եմ գալու ու ինչ լսեմ: Բայց չէ, մտքերս հզոր ուժ ունեին և ես հայտնվեցի իմ երազանքի տաքսիի մեջ: Դասական երաժշտություն ու նաև Project LA-ի շարունակությունը: Երեկվա համալիրում հավաքված բոլոր մարդիկ են ինձ տպավորել: Հեռախոսի մեջ երգի բառեր փնտրողներ, բեմի էկրանից բանաստեղծությունները կարդացողներ ու Գոռի հետ ձայնակցողներ... ահավոր սիրուն էր: Համալիրը շաատ փոքրա նման էներգետիկայի համար:
Կողքս մի զույգ էր նստած...տղան անընդհատ կրկնում ու շնորհակալություն էր հայտնում բացահայտման համար: Բոլորն էին երգում, առանց բացառության: Ես սպասեմ այս երգի որակով ձայնագրված տարբերակին: Անհամբեր սպասում եմ իմ սրտի Project LA»:
