Թարմացված։ Ազատ գյուղի կացարանում բռնկված հրդեհի հետևանքով զոհված զինծառայողների ծնողները, որոնք այսօր երեկոյան փակել էին Երևան-Սևան ճանապարհը, որոշել են այն բացել: Նրանք կսպասեն վարչապետ Նիկոլ Փաշինյանի ու պաշտպանության նախարար Սուրեն Պապիկյանի կողմից տեղեկատվության՝ հանդիպման և պարզաբանումներ ստանալու համար: Այդ մասին Գեղարքունիքի մարզպետ Կարեն Սարգսյանի հետ զրույցում նշեց փաստաբան Նորայր Նորիկյանը՝ հավելելով, որ ճանապարհի բացումը զոհված զինծառայողների ծնողները խնդրում են դիտարկել իբրև բացառիկ հարգանք Հայաստանի Հանրապետության և ՀՀ քաղաքացիների նկատմամբ։ |
Ազատ գյուղի զինվորական կացարանում զոհված 15 զինծառայողների ծնողները փակել են Երևան-Սևան մայրուղին՝ պահանջելով վարչապետ Նիկոլ Փաշինյանը և պաշտպանության նախարար Սուրեն Պապիկյանի հետ հանդիպում։ Այս մասին իր ֆեյսբուքյան էջում գրել է զոհված զինծառայողների ծնողների ներկայացուցիչ Նորայր Նորիկյանը։
«Ազատ գյուղի զինվորական կացարանում զոհված 15 զինծառայողների ծնողները փակել են Երևան-Սևան մայրուղին՝ պահանջելով, որ վարչապետ Նիկոլ Փաշինյանը և պաշտպանության նախարար Սուրեն Պապիկյանը գան և պատասխանեն իրենց հարցերին ու ներկայացնեն բացատրություններ իրենց որդիների զոհվելու դեպքի կապակցությամբ, կամ կոնկրետ օր ու ժամ ասեն, թե ե՞րբ կընդունեն իրենց՝ նույն հարցերին պատասխանելու համար․․․»,- գրել է Նորիկյանը։