Այսօր ԱԺ-ում լրագրողների հետ ճեպազրույցի ժամանակ Ալեն Սիմոնյանն ասել է, որ ռուս սահմանապահների՝ «Զվարթնոց»-ից դուրս գալու որոշումն անփոփոխ է։ Նա անդրադարձել է նաև հայ-թուրքական սահմանին կանգնած սահմանապահներին․ «Հիմա խոսում են, թե բա՝ Թուրքիայի սահմանն ո՞վ է պահելու, ես խիստ կասկած ունեմ, որ եթե Թուրքիան որոշի Հայաստանի Հանրապետության վրա հարձակվել, ռուս սահմանապահները կարողանալու են, կամ գործելու են և պաշտպանելու են։ Բայց այդտեղից ռուս սահմանապահներին հանելու վերաբերյալ խոսակցություն չի եղել։ Մի բան պետք է ֆիքսենք, որ ինչքան Հայաստանին է պետք եղել ու պետք է ռուսական զորքերի ներկայությունը, երկու այդքան Ռուսաստանին է պետք եղել»,- ասել է ԱԺ նախագահը։

***

«Տավուշի բնակիչները և բոլոր իշխանությունները միշտ իմացել են, որ գծից այս կողմ Հայաստանի Հանրապետությունն է, այն կողմ՝ Ադրբեջանը»,- այսօր ԱԺ-ում լրագրողների հետ ճեպազրույցի ժամանակ ասել է Ալեն Սիմոնյանը։ «Հիմա տեղի է ունենում մի գործընթաց, որի անունն է Հայաստանի և Ադրբեջանի միջև սահմանի գծում, ոչ թե գծում, այլ՝ վերականգնում, ինչն իրավաբանական փաստաթղթերով ապացուցված է»,- հավելել է ԱԺ նախագահը։ Նա իր խոսքում նշել է նաև, որ չի կարող երաշխիքների մասին խոսել, համաձայն որոնց՝ տարածքների հանձնումից հետո ադրբեջանցիները դուրս կգան օկուպացված տարածքներից․ «Կարող եմ ասել, որ այդ պրոցեսը պետք է հայելային տրամաբանության մեջ տանենք, բայց ելման կետը, որտեղից պետք է սահմանն ուրվագծվի, ակնհայտ է, որ ճիշտ է սկսել Տավուշի մարզից, քանի որ այնտեղ վիճելի մասերն ավելի քիչ են»,- ասել է Սիմոնյանը՝ չբացառելով, որ եթե տարածքները չհանձնվեն, Ադրբեջանը կհարձակվի։

***

ԱԺ «Հայաստան» խմբակցության պատգամավոր Գառնիկ Դանիելյանի ֆեյսբուքյան գրառումը․ «ԱԺ նախագահ հանդես եկող սույն անձը հայտարարել է, թե փնտրում է այն մարդկանց, որոնք կասեն, թե դրանք ՀՀ տարածք են:
Ըստ Ալեն Սիմոնյանի՝ ՀՀ-ն օկուպացրել է Ադրբեջանից տարածքներ, և, որ Ադրբեջանը կարող է դրանք հետ վերցնելու պատրվակով ցանկացած պահի հարձակվել:
Սրանով լեգիտիմ հիմքեր են տալիս Ադրբեջանին՝ ՀՀ-ի վրա հարձակում գործելու համար:
ԱԺ նախագահ կոչվածը, փաստորեն, ՀՀ-ին համարում է ագրեսոր պետություն և, առանց որևէ դելիմիտացիոն և դեմարկացիոն գործընթացի, իր շեֆի օրինակով հայտարարում, թե ՀՀ-ի այս կամ այն մասը պատկանում է թշնամուն:
Երկրի առաջին դեմքերից մեկը ուղիղ ասում է թշնամուն, որ մեր բանակը կանգնած է Ադրբեջանի տարածքում, և վերջինս հանգիստ կարող է մտնել ու գերեվարել 100-ավոր սահմանապահ հայ զինվորների:
Ահա թե ովքեր են իրականում պատերազմի կոչ անողները և պատերազմ բերողները:
Հ.Գ. Փնտրելու կարիք չկա. այդ մարդիկ Տավուշում են և սպասում են իրեն»։

***

ՀՀԿ Գործադիր մարմնի անդամ Էդուարդ Շարմազանովի ֆեյսբուքյան գրառումը․ «Իսկ Նիկոլը 2023-ին պաշտպանե՞ց արցախցիներին ադրբեջանական ագրեսիայից, որ մի հատ էլ օտարների բոստանն եք քար նետում։
Նիկոլի ԱԺ նախագահն ասում է՝ կասկածում եմ, որ եթե Թուրքիան հարձակվի, ռուս սահմանպահները մեզ պաշտպանեն։
Մի կողմ թողնենք, թե ռուսներն ի՞նչ կանեն։
Մի հարց նիկոլիստներին։
Իսկ ի՞նչ արեցիք դուք ու ձեր Նիկոլը, երբ Ադրբեջանը 2023-ի սեպտեմբերին հարձակվեց Արցախի վրա։
Պաշտպանեցի՞ք Արցախն ու արցախահայերին։
Իհարկե՝ ոչ։
Փուռը տվեցիք։
Ավելին, ձեր Նիկոլն ուղիղ եթեր մտավ ու ասեց, որ չի ներքաշվելու պատերազմի մեջ։
Դուք կանաչ լույս վառեցիք Արցախի հայաթափման համար։
Գոնե լռեք էլի, նամուս ունեցեք։
Նամուսը շան առաջ գցել են, շունը չի կերել…»։

***

ԱԺ նախկին պատգամավոր, ադրբեջանագետ Տաթևիկ Հայրապետյանը ֆեյսբուքյան իր էջում գրում է․ «ՀՀ իշխանությունները Բաքվի հնարավոր ագրեսիան արդարացնողն են, ավելին՝ դրան նպաստողն են ու դա հայ հանրության դեմ օգտագործողը։ Փաստացի ասում են, դե եթե չեք թողում հանձնենք, ապա կհարձակվեն, իսկ ինչո՞ւ չհարձակվեն․․․
Ի՞նչ կոչես սա, եթե ոչ՝ կոլաբորացիոնիզմ»։