Այսօր ԱԺ-ում «Ժառանգություն» խմբակցության պատգամավոր Ռուբիկ Հակոբյանի կողմից հրավիրված ասուլիսը չկայացավ: Լրագրողները բոյկոտեցին ասուլիսը՝ ի նշան լրագրողական համերաշխության: Պատգամավորը բրիֆինգների սենյակ մտավ մենակ, որտեղ նրան սպասում էր միայն ԱԺ լրատվական ծառայության լրագրողն ու օպերատորը: Մյուս լրագրողները կանգնեցին դռան մոտ` չմտնելով ասուլիսի սրահ։ Նրանց շարքերում էր նաև լրագրող Վահե Մակարյանը, ում հետ բախման մասին պետք է պարզաբաներ Ռուբիկ Հակոբյանը:
Հիշեցենք, որ օրեր առաջ խորհրդարանում ԱԺ պատգամավոր Ռուբիկ Հակոբյանը հայհոյել էր լրագրող Վահե Մակարյանին` հարվածելով նրա աչքին: Միջադեպից հետո պատգամավորը ներողություն էր խնդրել միայն Խորհրդարանից, իսկ լրագրողին անվանել խուլիգան: Հավելենք, որ մի շարք ՀԿ-ներ դեպքից հետո պահանջում էին պատգամավորից ներողություն խնդրել լրագրողից։
