Նախօրեին հրազենային վիրավորումից մահացած Գրանիկ Վարդանի Խնկոյանը Շիրակի մարզի Բենիամին գյուղից էր, զորակոչվել էր հունվար ամսին, ծառայում էր Արարատում:
Նյուզ.am-ի հետ զրույցում Բենիամին վարչական շրջանի ղեկավար Արտակ Անտոնյանը հայտնեց, որ պաշտոնական վարկածի Գրանիկը ինքնասպան է եղել, սակայն դեռ մանրամասների չի տիրապետում:
«Գրանիկը Արարատում էր ծառայում, ճիշտն ասած լսել էի, որ երեկ մի դեպք էլ է եղել, բայց չեմ կարող ասել, թե ինչ է պատահել, մանրամասների չեմ տիրապետում: Գրանիկը մի քանի օր առաջ արձակուրդ էր եկել, տեսել եմ իրեն, խոսել, գոհ էր ծառայությունից: Իրենք յուրահատուկ ընտանիք են, իրենից փոքր երկու եղբայր էլ ունի Գրանիկը, հայրն ու մայրն էլ գյուղատնտեսական աշխատանքներով են զբաղվում: Գրանիկը շնորհքով, աշխատասեր երեխա էր, անհավատալի է, երեկ առավոտ էլ հոր հետ էր խոսել, ասել էր, որ ամեն ինչ նորմալ է»,- ասաց նա:
Գյուղապետը չի հավատում ինքնասպանության վարկածին, քանի որ ճանաչում է Գրանիկ Խնկոյանին. ասում է, որ որեւէ վատ սովորություն չի ունեցել. «Ճանաչում էի իրեն, այդ երեխան խելոք, աշխատասեր երեխա էր, վատ սովորություններ չուներ, ի՞նչը պետք է պատճառ լիներ, որ ինքնասպանություն գործեր, չեմ կարողանում հասկանալ: Ուղղակի ափսոս է, որ խաղաղ վիճակում զինվոր է զոհվում»:
Ավելի վաղ հայտնել էինք, որ դեռեւս չպարզված հանգամանքներում օգոստոսի 9-ին էլ, հրազենային վիրավորման հետեւանքով, մահացել էր զինծառայող Ժորա Կարապետյանը:
Ըստ տեղեկությունների երկու դեպքն էլ տեղի է ունեցել նույն զորամասում:
Քաղաքագետ Գագիկ Համբարյանն էլ այս առիթով գրում է․
«Երկու զոհ (ըստ տարածվող լուրերի` ինքնասպանություն) մեկ օրում նույն զորամասում, որը գտնվում է սահմանից հեռու...
Լռում են հայտնի ՀԿ֊ները, որոնք նախկինների օրոք, եթե նույնիսկ հրադադարի ռեժիմի խախտման ժամանակ զոհ ունենայինք սկանդալ և մեծ աղմուկ կբարձրացնեին ու ամեն ինչում իշխանություններին կմեղադրեին, լռում են քաղաքական ուժերը և ամենասարսափելին` լռում է հասարակությունը...Տպավորություն է, որ Երևանի մոտ գնտվող զորամասում երկու զոհ ունենալը շատ նորմալ երևույթ է...
Ազգ չկա, դե իսկ ժողովուրդն էլ զբաղված է` քեֆերով ու տաշի֊տաշուների մեջ է...
Դեգրադացիան հենց սա է...»։
