Մոսկվայում ձերբակալվել է ադրբեջանցի հայտնի ֆիթնես մարզիչ Քյամիլ Զեյնալին, գրում են ադրբեջանական լրատվամիջոցները:

Զեյնալին տեսանյութը տեղադրել է Instagram-ի իր էջում՝ հայտնելով, որ Մոսկվայի «Դոմոդեդովո» օդանավակայանից իրեն տարել են ոստիկանական բաժանմունք:

«Նրանք ասացին, որ Հայաստանն իմ նկատմամբ միջազգային հետախուզում է հայտարարել»,- պարզաբանել է նա:

«Ես արդեն երրորդ անգամ եմ Ռուսաստանում, բայց ինձ միայն հիմա են ձերբակալել։ Հուսով եմ մեր (ադրբեջանական-խմբ.) պետական կառույցները կաջակցեն ինձ: Այս պահին ես գտնվում եմ ոստիկանական բաժանմունքում»,- գրել է նա:

Թե ինչու են ՀՀ իշխանությունները հետախուզում հայտարարել նրա նկատմամբ, չի հստակեցվում:

Ըստ համացանցում տարածված տեղեկատվության` ՌԴ-ում ձերբակալված ադրբեջանցին ոչ միայն 2020թ. սադրում էր Մոսկվայում հայերի նկատմամբ հարձակումները, այլև 44-օրյա պատերազմի ժամանակ Արցախում «Ալլահ Աքբար» բղավոցներով դանակով կտրել է հայ ծերունու կոկորդը:

Տեսանյութն՝ Asekose․am-ի տելեգրամյան ալիքում

Թարմացված․ ԱԺ նախկին պատգամավոր, ադրբեջանագետ Տաթևիկ Հայրապետյանը թելեգրամյան իր էջում գրում է. ««Մոսկվայի «Դոմոդեդովո» օդանավակայանում Քամիլ Զեյնալիի կալանավորման հարցը Ռուսաստանում Ադրբեջանի դեսպանատան վերահսկողության տակ է»,- նշել է ՌԴ-ում Ադրբեջանի դեսպանատունը։
Երեկ տեղեկություն տարածվեց, որ Զեյնալիին, ով 2020 թվականին Արցախում հայ մարդու էր գլխատել, դա լուսանկարել և տարածել իր սոցցանցերում, բերման է ենթարկվել «Դոմոդեդովո» օդանավակայանում։ Հաղորդվող տեղեկության համաձայն՝ նրան բռնել են, քանի որ հայկական կողմը հետախուզում է հայտարարել վերջինիս նկատմամբ։

Ադրբեջանական մեդիա տիրույթում հիստերիա է, թե ինչպես են համարձակվել բռնել իրենց գլխատող մարդասպանին, շուտով նոր հերոս կկերտեն նրանից։

Սա կարևոր նախադեպ է, բայց սպասենք իրադարձությունների հետագա զարգացմանը»: