«Իրազեկ քաղաքացիների միավորում» ՀԿ հիմնադիր, ծրագրերի համակարգող Դանիել Իոաննիսյանը ֆեյսբուքյան իր էջում գրել է.
«Սյունիքի` սահմանային անիշխանության դեպքերը նորից ապացուցում են, որ Ոստիկանության և ԱԱԾ-ի բարեփոխումներ են պետք:
Սյունիքի այն բնակավայրերում, որոնք պատերազմի ու Զանգելանի և Քուբաթլուի շրջանների մնացած հողերի հանձնման արդյունքում դարձել են սահմանամերձ, պետք է լրջագույն աշխատանք տարվեր Ոստիկանության ու ԱԱԾ-ի կողմից։
ԱԱԾ-ն պետք է սերտ համագործակցություն սկսեր ՏԻՄ ու այլ պետական ու մասնավոր մարմինների հետ, հստակ ներկայացներ, թե որտեղ ինչ է փոխում, որտեղ ինչ նոր ռիսկեր կան և որ դեպքում ինչ անել։
Ոստիկանությունը պետք է խոսեր բոլոր համայնքների բոլոր բնակիչների հետ, բացատրեր, թե ինչն է փոխվում, ինչն է անվտանգ, իսկ ինչը` այլևս ոչ, տար կոնտակտներ, ուր քաղաքացիները կարող են դիմել հարցերի և խնդիրների դեպքում։
Ոստիկանությունը պետք է նաև պարեկություն իրականացներ սահմանամերձ բնակավայրերում ու ճանապարհներին, որ քաղաքացիներն իրենց ապահով զգան։
Բայց ներկայիս Ոստիկանությունն ու ԱԱԾ-ն չեն կարողանում նորմալ, մարդավարի աշխատել հանրության հետ։ Արդյունքում հանրությունն իրեն անպաշտպան ու բախտի քմահաճույքին թողնված է զգում, իսկ ուժայիններն ընկալվում են որպես ռեպրեսիվ մեխանիզմներ և ոչ անվտանգության ապահովոզներ»։
