Փաշինյանը ընդհատեց Պուտինին ու «Զանգեզուրի միջանցքի» մասով պատասխանեց Ալիևին
Ադրբեջանի նախագահը Եվրասիական բարձրագույն տնտեսական խորհրդի գիտաժողովի ժամանակ կրկին խոսեց այսպես կոչված «Զանգեզուրի միջանցք»-ի մասին: ՀՀ վարչապետ Նիկոլ Փաշինյանը նիստը նախագահող Վլադիմիր Պուտինից արձագանքի թույլտվություն խնդրեց ու մասնավորապես ասաց. «Իր ելույթում Ադրբեջանի նախագահը կիրառեց մի արտահայտություն, որը վերջին տարիներում որպես գլխագիր է ծառայում Հայաստանի հանդեպ տարածքային ոտնձգություններ ներկայացնելու համար: Սա օգտագործվում է եռակողմ հայտարարության 9-րդ կետի շրջանակներում: Այնինչ այդ հայտարարությունում խոսվում է միայն մեկ միջանցքի մասին, որը պետք է լիներ ռուս խաղաղապահների վերահսկողության տակ, և ցավոք սրտի, ապօրինաբար արգելափակվել է Ադրբեջանի կողմից: Մյուս կողմից ցանկանում եմ ընդգծել Հայաստանի կամքը՝ բացելու տարածաշրջանում բոլոր կումունիկացիաները՝ թե տնտեսական և տրանսպորտային: Սա շեշտվում է եռակողմ հայտարարության 9-րդ կետով: Շնորհակալություն»:
Պուտինն էլ իր հերթին ակնարկեց. «Բայց այն ինչ ես լսեցի Ադրբեջանի նախագահի ելույթում, այն էր, որ ստեղծվում են պայմաններ՝ 1991 թվականի սահմանները ճանաչելու համար: Սա հույս է տալիս ենթադրելու, որ Հայաստանի ու Ադրբեջանի միջև պայմանավորվածություններ ձեռք կբերվեն տրանսպորտային ապաշրջափակման շուրջ»:
Ալիևն էլ ի պատասխան նշեց. «Պետք է վառ երևակայություն ունենալ ու շատ ջանք թափել իմ խոսքերում Հայաստանի տարածքային ամբողջականության նկատմամբ ոտնձգություններ գտնելու համար: Այդպիսի հավակնություններ Ադրբեջանը չունի: Ինչ վերաբերում է «միջանցք» եզրույթին, ապա այն ուրիշի տարածքի հանդեպ հավակնություններ չի նշանակում, այն կիրառվում է նաև Հյուսիս-Հարավ, Արևելք-Արևմուտք միջանցքների համար: «Միջանցք»-ը միջազգային եզրույթ է և մարդիկ, ովքեր ծանոթ են միջազգային տերմիոնոլգիային, ապա դրան այնքան կարևոր նշանակություն չէին տա, ինչպես դա անում է Հայաստանի վարչապետը: Ես կարծում եմ, որ կա հնարավորություն խաղաղության համաձայնագիր կնքելու, հատկապես հաշվի առնելով այն, որ Հայաստանը պաշտոնապես ճանաչել է Ղարաբաղն Ադրբեջանի մաս»:
ՀՀ վարչապետը կրկին շեշտեց, որ եռակողմ հայտարարության մեջ միայն մեկ անգամ է շեշտվում «միջանցք» բառը, և այն վերաբերում է Լաչինի միջանցքին, որը պետք է գտնվեր ռուս խաղաղապահների հսկողության տակ: «Սակայն, ռուս խաղաղապահների աչքի առաջ Ադրբեջանը փակեց այդ միջանցքը»,- շեշտեց Փաշինյանը:
Ավելի վաղ, Իլհամ Ալիևը, ներկայացնելով իր երկրի ձեռքբերումները տնտեսական ոլորտում, կրկին ակնարկեց այսպես կոչված «Զանգեզուրի միջանցքի» մասին: «Մենք նախաձեռնել ենք Զանգեզուրի միջանցքի ստեղծումը, որը ոչ միայն կկապի մեր հայրենիքի հիմնական մասը Նախիջևանի Ինքնավար Հանրապետության հետ, այլև կդառնա միջազգային երկաթգծային ուղիների մաս: Ադրբեջանն արդեն ունի 8 օդանավակայան, որոնցից 2-ը կառուցվել են ազատագրված (Արցախի Հանրապետությունից բռնազավթված-խմբ.) տարածքներում՝ Ֆիզուլիում ու Զանգելանում վերջին 2 տարում: 9-րդ միջազգային օդանավակայանը կառուցվում է ազատագրված Լաչինում և նախատեսվում է շահագործել 2025 թվականին: Ադրբեջանի տնտեսությունն ինքնաբավ է և դրսից օգնության կարիք չունի: Երկրի արժութային պահուստը 10 անգամ գերազանցում է երկրի պետական պարտքը, որը գնալով նվազում է: Երկրի բնակչությունը վերջին տարիներին 7 միլիոնից հասել է 10 միլիոնի»,- ասաց Ալիևը:
Դիտեք նաև՝
