Այսօր ԱԺ–ում լրագրողների հետ զրույցում ՀՀ ԱԺ փոխխոսնակ, ՀՀԿ պատգամավոր Էդուարդ Շարմազանովն անդրադարձավ Նիկոլ Փաշինյանի՝ նոյեմբերի 24-ին Երևանում մեծ երթ անցկացնելու հայտարարությանը.
«Վարչապետի պաշտոնակատար Նիկոլ Փաշինյանը հավանաբար հասկացավ, որ իր մոտ տնտեսություն զարգացնելը, երկիր կառավարելը վատ է ստացվում կամ ընդհանրապես չի ստացվում և որոշեց զբաղվել իր հարազատ գործով՝ քայլերթեր կազմակերպելով»,- նշեց Շարմազանովը և ավելացրեց.
«Այս ամիսների ընթացքում ակնհայտ դարձավ, որ Նիկոլ Փաշինյանի և նրա կառավարության անդամների մոտ ավելի լավ ստացվում է քայլել և միտինգներ կազմակերպելը, քան տնտեսությունը զարգացնելը և աշխատատեղեր ստեղծելն ու ներդրումներ բերելը: Ում մոտ ինչ լավ ստացվում է, նա պետք է դրանով զբաղվի։
Հուսով եմ՝ մի օր ինքն ամբողջությամբ կզբաղվի քայլերթեր կազմակերպելով, իսկ կառավարության գործը կտա ավելի պրոֆեսիոնալ գործիչների»,– ասաց ՀՀ ԱԺ փոխխոսնակը։
Իսկ հարցին, թե ՀՀԿ-ի մոտ ի՞նչն է լավ ստացվում, Շարմազանովը պատասխանեց. «Ժամանակը բոլորի պատասխանը կտա»: