Երևանում ավտոբուսի վարորդները հայտնեցին գործադուլի պատճառները՝ աշխատավարձի բարձրացումից մինչև տարրական պայմանների բացակայություն: Վարորդներից մեկը նշեց, որ նույնիսկ զուգարան չկա. «Մեր պահանջները շատ են՝ ընդհուպ մինչև մարդկային տարրական պայմաններ: Զուգարան չունենք: Հաճելի կլինի՞, որ ավտոբուսը կանգառում կանգնեցնեմ, ասեմ՝ ժողովո՛ւրդ ջան, կներեք, ես զուգարանի կարիք ունեմ»:

***

Վարորդների խոսքով՝ քաղաքային իշխանությունները խոստացել էին աշխատավարձի բարձրացում, բայց հիմա հետ են կանգնում իրենց ասածից: «Մեզ խոստացել էին աշխատավարձի բարձրացում՝ 100-150 հազարով: Այսօր, իրենց ասելով, պարզվում է, որ իրենք այդ թիվը չեն ասել, բայց բոլորս լսել էինք իրենցից դա: Մեր աշխատանքային պայմանագրով 12 ժամ կարող ենք աշխատել՝ գումարած 2 ժամ հանգիստ: Մեզ երեկ առաջարկել են հավելյալ ժամերի համար ժամը 700 դրամ՝ ծիծաղելի թիվ, էն էլ 10-ից հետո: Բազմիցս դիմել ենք, մեզ խաբել են: Այդ պատճառով էլ այստեղ կանգնած ենք: Էլ ուրիշ տարբերակ չկա, որ լսելի լինենք»,- նշել է ավտոբուսի վարորդը:

***

Մայրաքաղաքում տրանսպորտը չի աշխատում, վարորդները բունտ են անում։

«Առավոտյան տնօրենը դուրս եկավ, ասաց՝ պայմանները սրանք են, ում ձեռք է տալիս, թող ավտոբուսը վերցնի, գնա աշխատանքի, ում ձեռք չի տալիս, ազատված եք, գնացեք, դիմում գրեք: Դարպասներն էլ փակեցին, որ չկարողանանք ներս մտնել»,- բողոքի ակցիայի ժամանակ նշեց ավտոբուսի վարորդներից մեկը՝ ընդգծելով, որ 3 տարի է նույնիսկ սովորական զուգարանի հարց չի լուծվել: «Իրենց պայմանները ոչ մեկին ձեռք չեն տալիս: Ամեն անգամ փափուկ բարձը դնում են գլխներիս տակ, ճանապարհում գործի: Բայց հերիք եղավ, բոլ եղավ, մենք էլ ենք մարդ»,- ասաց վարորդը:

Հիշեցնենք՝ առավոտից ավտոբուսի վարորդները գործադուլ են անում՝ պահանջելով աշխատավարձի բարձրացում և պայմանների բարելավվում: