Հարկատուների հաշվին որևէ գումար չի տրամադրվի Ryanair ավիաընկերությանը, կարող եք հանգիստ լինել։ Այս մասին լրագրողների հետ զրույցում ասաց ՀՀ փոխվարչապետ Տիգրան Ավինյանը։
«Օդի տուրքի արտոնությունը, որը սահմանել ենք, սահմանվել է բոլոր այն ընկերությունների համար, որոնք կսպասարկեն նոր ուղղություններ, որոնք չեն սպասարկվել նախորդ 12 ամիսների ընթացքում։ Ոչ մի ուրիշ արտոնություն չի տրամադրվել»,-ասաց փոխվարչապետը։
Այս պարագայում, թե ինչ շահույթ է ակնկալում ավիաընկերությունը, փոխվարչապետը նկատեց. «Իրենց բիզնես ծրագրի մանրամասներին և դետալներին ես ծանոթ չեմ, բայց նմանատիպ ընկերությունների ամբողջ տրամաբանությունն այն է, որ նրանք կենտրոնանում են հնարավորինս էֆեկտիվության վրա»,-ասաց Տիգրան Ավինյանը։
Վերջինս ընդգծեց, որ այս արտոնությունը սահմանում են բոլոր այն ընկերությունների համար, որոնք նոր ուղղություններով կանոնավոր չվերթներ են կազմակերպելու դեպի Զվարթնոց օդանավակայան։ Փոխվարչապետը նկատեց, որ սա նոր դաշտ է ստեղծում, որպեսզի մրցակցությունն ավելի բարելավվի և նոր խաղացողներ մտնեն շուկա։
«Հայաստանի նման երկիրը խնդիր ունի՝ իր կապերն օդային ճանապարհով ամրապնդելու և ուղիղ չվերթների քանակն ավելացնելու»,-ասաց Տիգրան Ավինյանը՝ հավելելով, որ երկրորդ ուղղությունը, որը պետք է զարգացնել, տեղական ավիափոխադրողների ծրագրի խթանումն է, որի մասին 1-2 տարի հետո կարող են խոսել։