«Ժամանակ» թերթի տեղեկություններով՝ նախօրեին Սերժ Սարգսյանի երդմնակալության արարողությանը ԲՀԿ պատգամավորները եւ այլ անդամներ մասնակցել են ոչ թե սեփական որոշմամբ կամ ցանկությամբ, այլ երկուստեք պայմանավորվածության արդյունքում։
«Ճիշտ է, ԲՀԿ ղեկավար Գագիկ Ծառուկյանը չէր մասնակցում արարողությանը եւ իր քայլը պատճառաբանելու համար մեկ օր առաջ մեկնել էր Մոսկվա, բայց մոտ քսան կուսակիցների հրահանգել էր, որ մասնակցեն։ Որոշ տեղեկությունների համաձայն՝ նույնիսկ Գ. Ծառուկյանի եւ Ս. Սարգսյանի միջեւ նախապես հանդիպում է եղել, եւ նրանք պայմանավորվել են, որ ԲՀԿ ղեկավարը թեեւ չի մասնակցի երդմնակալության արարողությանը, բայց իր մի շարք պատգամավորների կուղարկի։
Քաղաքական շրջանակներում խոսում են, որ Ս. Սարգսյանի եւ Գ. Ծառուկյանի հանդիպումը կազմակերպել է վերջինիս խնամի, ԱԺ նախագահ Հովիկ Աբրահամյանը։ Իսկ քննարկումներն ու պայմանավորվածություններն արդեն ձեռք են բերվել առանց Հ. Աբրահամյանի»,- գրում է «Ժամանակը»։
