Երևան քաղաքի ընդհանուր իրավասության դատարանի «Կենտրոն» նստավայրում դատավոր Կարեն Ֆարխոյանի նախագահությամբ ընթացավ ՀՀ ԱԺ «Հայաստան» խմբակցության պատգամավոր Լևոն Քոչարյանի և Սերգեյ Ասատուրովի գործով դատական նիստը: Նրանց մեղադրանք է առաջադրված անհնազանդության ակցիաների ժամանակ ոստիկանության ծառայողների օրինական գործողությանը ենթադրաբար միջամտելու և բռնություն կիրառելու համար:

Այսօրվա նիստում հարցաքննվում էր տուժող ճանաչված ոստիկանության աշխատակից Հրաչ Խաչատրյանը:

Լևոն Քոչարյանը և պաշտպաններ Ալեքսանդր Կոչուբաևը, Արամ Վարդևանյանն ու Էրիկ Ալեքսանյանը մայրաքաղաքի Ամիրյան փողոցում տեղի ունեցած իրադարձությունների, Լևոն Քոչարյանին ոստիկանության «Շենգավիթ» բաժանմունք բերման ենթարկելու մանրամասները ճշտելու նպատակով հարցեր ուղղեցին տուժողին, որը հարցերի մեծ մասին հանգամանալից պատասխաններ չտվեց, պատճառաբանելով, թե մանրամասները չի հիշում։ Այդ առումով փաստաբանները արձանագրեցին, որ տուժող ճանաչված ոստիկանը իրենց հետաքրքրող հարցերին պատասխանում է երկակի ստանդարտներով: Այսինքն՝ այն դրվագները, որոնք իր կարծիքով համեմատաբար նպաստավոր են, նկարագրում է առանց դժվարանալու, իսկ դեպքերը, որտեղ իր կատարած գործողությունները խոցելի են, պատճառաբանում է, թե չի հիշում:

Նիստը հետաձգվեց: Հաջորդ նիստը կկայանա 2025 թվականի հունվարի 24-ին, ժամը 16:00-ին, որի ընթացքում մեղադրվող կողմը կշարունակի հարցեր տալ տուժած կողմին:

«Արդարադատության առումով սպասելիք չկա, որովհետև եթե լիներ արդարադատություն, էս գործը իրավունք չուներ լինել դատարանում»,- լրագրողների հետ ճեպազրույցում նշեց ասաց ԱԺ «Հայաստան» խմբակցության պատգամավոր Լևոն Քոչարյանը՝ անդրադառնալով այսօրվա՝ հունվարի 7-ի դատական նիստին։

Հիշեցնենք՝ Երևան քաղաքի ընդհանուր իրավասության առաջին ատյանի դատարանի Կենտրոն նստավայրում տեղի էր ունենում Լևոն Քոչարյանի և Սերգեյ Ասատուրովի վերաբերյալ գործով դատական նիստ։ Լևոն Քոչարյանը մեղադրվում է 4 ոստիկանի նկատմամբ իբր բռնություն գործադրելու մեջ, չնայած տեսախցիկները ֆիքսել էին, որ հենց ոստիկաններն են մեքենայի մեջ ծեծի ենթարկում Լևոն Քոչարյանին։

«Սպասելիքն իրականում այն է, որ մարդիկ տեսնեն այս ամենի աբսուրդայնությունը, հանրությունը լավ հասկանա այս իշխանությունների իրական բնույթը»,- ընդգծեց Լևոն Քոչարյանը։