Ժամեր առաջ պայթյուն է տեղի ունեցել Վանաձորում: Ժամը 17:40-ի սահմաններում ոստիկանության Բազումի բաժին ահազանգ է ստացվել, որ Վանաձորի «Թթու ջուր» տանող ճանապարհի ձկան խանութում պայթյուն է տեղի ունեցել:
Դեպքի վայրում աշխատում են ոստիկանության Բազումի բաժնի ծառայողները՝ բաժնի պետ Վազգեն Թորոսյանի գլխավորությամբ: Տեղում են նաեւ փորձաքրեագետները: Պայթյունի հետեւանքով վնասվել է ձկան խանութի դիմային ապակին, ինչպես նաեւ խանութի ներսն ամբողջությամբ՝ գույքի հետ միասին: Խանութը գտնվում է քաղաքի կենտրոնական հատվածում: Հարեւանությամբ կան մի շարք այլ խանութներ եւս:
«Հայկական ժամանակ»-ի տեղեկություններով՝ պայթյունը տեղի է ունեցել խանութի տարածք նետված ձայնային նռնակից: Ըստ նախնական տեղեկությունների, տուժածներ չկան: Փաստի առթիվ ոստիկանության Բազումի բաժնում նյութեր են նախապատրաստվում:
