«Միշտ պատրաճանաչ հաճախորդ եմ եղել բանկերում, ոչ մի օր ու ժամ չեմ ուշացրել վճարումներս, անգամ բանկերից զանգում էին ինձ ու մեծ գումարներ առաջարկում՝ վարկ վերցնելու համար, բայց «Արդշինբանկ»-ի խարդախության պատճառով հայտնվեցի «սև ցուցակում»,- այս մասին Օրագիր․Նյուզ-ի հետ զրույցում պատմել է ընթերցողներից մեկը։
Նրա խոսքով՝ օրեր առաջ առողջական խնդիրները լուծելու նպատակով գնացել է մեկ այլ բանկ՝ վարկ վերցնելու, սակայն բանկը մերժել է, ասելով, որ վերջինս գտնվում է «սև ցուցակում»։
«Զարմացա, ասում եմ՝ ո՞նց կարող եմ «սև ցուցակում» լինել, եթե տարիներ շարունակ բանկերի հետ խնդիր չեմ ունեցել, ոչ մի ուշացում չի եղել։ Ստուգեցին, պարզվեց՝ դեռևս 1․5 տարի առաջ «Արդշինբանկ»-ի մինչև վերջին լուման մարած վարկիս վրա տոկոս է ավելացել։
«Զանգեցի «Արդշինբանկ», օպերատորն ասաց, որ վարկը մարելուց հետո պետք է զրոյական հաշիվներս պահանջեի, ինչի մասին ես տեղյակ էլ չեմ եղել, ինձ բանկի աշխատակիցները դրա մասին ոչինչ չեն ասել, հավանաբար միտումնավոր, իսկ հաշիվներս բաց մնալու հետևանքով սպասարկման վճարը կուտակվել է, իսկ բանկից ոչ մի ծանուցում ու նամակ չեն ինձ ուղարկել, որ գոնե կանխեի «սև ցուցակ»-ում հայտնվելս։
Պետք է բանկում զրոյական հաշիվը վերցնես ու համոզվես, որ ոչ մի հաշիվ, թեկուզ զրո դրամով բաց չի մնացել, այլապես հաշիվը բաց են թողնում, իսկ մի գեղեցիկ օր էլ իմանում ես, որ համ պարտք ես բանկին, համ էլ չվճարելու արդյունքում հայտնվել ես «սև ցուցակ»-ում։ Ու, եթե առողջական խնդրիս պատճառով բանկ էլ չգնայի, արդեն ԴԱՀԿ-ն էր մեր տուն գալու»։
Քաղաքացին ասել է, որ պատրաստվում է դիմել դատարան և «Արդշինբանկ»-ից պատասխան պահանջել իր կրած վնասի համար։
«Ինչքան լռեցինք, իրենց ապօրինությունների մասին չբարձրաձայնեցինք, այնքան սկսեցին ավելի շատ մարդկանց գլխին սարքել։ Մինչև բարձր ատյաններ այս գործը հասցնելու եմ»,- եզրափակել է նա։
