Քաղաքական մեկնաբան Հակոբ Բադալյանն էլ գրում է. «ԱՄՆ փոխնախագահն ասում է, որ խաղաղ միջուկային ծրագրի գործակցության առաջին փուլում ԱՄՆ 5 միլիարդ դոլարի նյութեր, տեխնոլոգիա կարտահանի Հայաստան, իսկ երկրորդ փուլի համար կկնքվի մոտ 4 միլիարդ դոլար արժողության պայմանագրեր:
Դա բացարձակապես չի նշանակում այդքան փողի ներդրում Հայաստանում: Դա նույնիսկ մոտավորապես դա չի նշանակում:
Ի՞նչ է մատուցվում պաշտոնական պրոպագանդայի մակարդակով: Որ ԱՄՆ 5 միլիարդ դոլար է ներդնելու Հայաստանում առաջին փուլով, 4 միլիարդ էլ՝ երկրորդ փուլով:
Ի՞նչ է սա, եթե ոչ փոխնապագահ Վենսի խոսքի աղավաղում: Նա բացարձակապես չի խոսում Հայաստանում այդքան փող ներդնելու մասին:
Բայց ըստ երևույթին ամերիկյան կողմը չի շտապի ուղղել «թարգմանական սխալը», որովհետև Վենսը նաև շատ հստակ, իհարկե ոչ ուղղիղ խոսքով, բայց շատ թափանցիկ կերպով՝ որ իրենց նպատակը Նիկոլ Փաշինյանի վերընտրությունն է:
Ավելին, գուցե մի քիչ հնչի դավադրապաշտական, բայց չեմ բացառի անգամ, որ թարգմանական սխալը բոլորովին պատահական կամ թյուրիմացաբար չէր, այլ ծրագրված: Մի կողմից Վենսը իր ուղիղ խոսքով որևէ պատասխանատու բան չի ասում Հայաստանում միլիարդներ ներդնելու մասին, մյուս կողմից պաշտոնական պրոպագանդային տրվում է այն հայերեն տարբերակով ըստ հայեցողության պտտելու «իրավունք»:
Ի վերջո առաջին անգամը հո չէ, որ «պտտելու» են հայ հանրության գլուխը: Մի պտույտ ավելի, մի պտույտ պակաս, ինչ տարբերություն»:

***

Փաստաբան Գոհար Մելոյանի ֆեյսբուքյան գրառումը․ «Պարտք սերունդների՞ն»
Ցանկացած նորմալ հայ մարդու համար 9 միլիարդ դոլարի ներդրման մասին լուրը հիանալի նորություն է, կարելի է ասել՝ երազանք:
Սակայն, կարդալով ԱՄՆ-ի փոխնախագահ Ջեյ Դի Վենսի ելույթը՝ ակնհայտ է դառնում, որ հարգարժան փոխնախագահը որևէ խոսք չի ասել Հայաստանում 9 միլիարդ դոլարի ներդրում իրականացնելու մասին։
Պարոն Վենսը նշել է, որ հարթվում է ճանապարհն ամերիկյան և հայկական ընկերությունների համար՝ քաղաքացիական միջուկային նախագծերի վերաբերյալ համաձայնագրեր կնքելու նպատակով, ինչը ենթադրում է մինչև 5 միլիարդ դոլարի արտահանում ԱՄՆ-ից, ինչպես նաև 4 միլիարդ դոլարի երկարաժամկետ աջակցություն՝ պայմանագրերի միջոցով։
Այսինքն՝ ԱՄՆ փոխնախագահը խոսել է 9 միլիարդ դոլարի տնտեսական գործունեության մասին, որը իրականացվելու է ԱՄՆ-ում, այլ ոչ թե Հայաստանում կատարվելիք ներդրման մասին։
*Ավելին, որևէ հստակեցում չկա այն մասին, թե ով և ինչ կերպով է վճարելու ԱՄՆ-ից մինչև 5 միլիարդ դոլարի արտահանման և 4 միլիարդ դոլարի աջակցության համար։
*Ակնհայտ է, որ ՀՀ կառավարությունն ի վիճակի չէ վճարելու նման գումարներ․ Հայաստանը պարզապես չունի այդպիսի միջոցներ և առաջիկա տարիներին չի էլ կարող ունենալ։
*Ակնհայտ է նաև, որ ԱՄՆ-ի կառավարությունը չի վճարելու նման արտահանման համար, քանի որ որևէ երկիր չի վճարում իր իսկ տարածքից իրականացվող արտահանման համար։
Հետևաբար, դրական գնահատելով փոխնախագահ Վենսի այսօրվա այցը՝ անթույլատրելի է նրա խոսքի դիտավորյալ խեղաթյուրումը և հայ հանրության շրջանում անհիմն սպասելիքների ձևավորումը»: