Լրագրող Բորիս Մուրազին ֆեյսբուքյան իր էջում գրել է․ «Խայտառակություն: Ֆրանսիայի դեսպանը ՔՊ թեզ է առաջ տանում: Այս հայտարարությունից հետո, եթե ընդդիմադիրները հանդիպեն այս դեսպանի հետ, ապա նշանակում է՝ իրենք իրենց ստախոս են համարում»։

Հիշեցնենք՝ «Ռադիոլուր»-ին տված հարցազրույցւոմ դեսպանն ասել էր․ «Եթե խոսում եք Լեռնային Ղարաբաղի ճանաչման մասին, ապա Լեռնային Ղարաբաղը որպես պետություն չի ճանաչվել ոչ միջազգային հանրության, ոչ էլ նույնիսկ Հայաստանի կողմից։ Ի դեպ, Հայաստանն էլ ընդունել է, ճանաչել է, որ Լեռնային Ղարաբաղն Ադրբեջանի մաս է կազմում Ալմա Աթայի հռչակագրի ընդունման պահից սկսած, քանի որ ԼՂ-ն Սովետական Ադրբեջանի մի շրջան էր։ Հետևաբար, նրանք, ովքեր պնդում են, թե Լեռնային Ղարաբաղն Ադրբեջանի մաս է ճանաչվել 2022 թվականին Պրահայում, ստում են, որովհետև Լեռնային Ղարաբաղը Հայաստանի կողմից Ադրբեջանի մաս է ճանաչվել Ալմա Աթայի հռչակագրի պահից սկսած։ Ի դեպ, Պրահան ընդամենը հղում է անում, հիշեցնում է Ալմա Աթայի հռչակագիրը։ Եվ այսօր հարցը հետևյալն է՝ ինչպե՞ս հասնել խաղաղության՝ արդար, կայուն, ամուր խաղաղության, որպեսզի վերացվեն Հայաստանի վրա կախված սպառնալիքները»։

«Մայր Հայաստան» շարժման առաջնորդ Անդրանիկ Թևանյանի ֆեյսբուքյան գրառումը․ «Հայաստանում Ֆրանսիայի դեսպան Օլիվիե Դըկոտինյին ստում է՝ հայտարարելով, թե, իբր, Հայաստանն ընդունել է, ճանաչել է, որ Լեռնային Ղարաբաղն Ադրբեջանի մաս է կազմում Ալմա Աթայի հռչակագրի ընդունման պահից սկսած, քանի որ ԼՂ-ն Սովետական Ադրբեջանի մի շրջան էր։
Ֆրանսիայի դեսպանն իր այս հայտարարությամբ նիկոլություն է անում՝ «Ղարաբաղը 30 տարի առաջ էին հանձնել, պարզապես խեղճ հարիֆ Նիկոլի ջեբը գցեցին» «պողոսների» համար նախատեսված ձևակերպման շրջանակներում։
Դեսպանը կա՛մ Ալմա Աթային նախորդած ու հաջորդած իրադարձությունների մասին չգիտի, կա՛մ ձև է անում, թե չգիտի։
Եթե Ղարաբաղը Ալմա Աթայի հռչակագրով ճանաչվել էր Ադրբեջանի մաս, ապա ինչի՞ շուրջ էին մինչև 44–օրյա պատերազմը բանակցում Հայաստանը, Արցախն ու Ադրբեջանը ԵԱՀԿ Մինսկի խմբի համանախագահներ Ֆրանսիայի, Ռուսաստանի, ԱՄՆ-ի միջնորդությամբ։
Իրականությունն այն է, որ Նիկոլ Փաշինյանը 2022թ․ հոկտեմբերի 6-ին Արցախը դվաճանաբար ճանաչեց Ադրբեջանի մաս՝ Ֆրանսիայի նախագահ Մակրոնի և եվրաչինովնիկ Շարլ Միշելի միջնորդությամբ, Թուրքիայի նախագահ Էրդողանին տված խոստման շրջանակներում ու ԱՄՆ նախագահ Բայդենի քավորությամբ։ Դրսի ուժերին հետաքրքրում էր ռուսական խաղաղապահների հեռացումն Արցախից ու թքած, թե ինչ կլիներ հայերի հետ։
Մակրոնը շատ լավ գիտի, որ անձնական մասնակցություն ու մեղավորություն ունի Արցախում հայերի էթնիկ զտման հարցում ու փորձում է մաքրվել՝ իր դեսպանի շուրթերով հայտարարելով, որ Լեռնային Ղարաբաղը 34 տարի առաջ է ճանաչվել Ադրբեջանի մաս։ Դա այնքան լկտի սուտ է ու պատմության այնպիսի նենգափոխում, որ անգամ Ալիևը նման բաներ չի հայտարարում։
Մակրոնն ու մյուսները պետք է իրենց մեղքն ընդունեն ու ամբողջ կյանքում ապրեն հանցագործի զգացողությամբ։ Թրամփի ընտրությունից հետո նրանք քաղաքական դիակներ են։
Ինչ մնում է Նիկոլ Փաշինյանին, ապա մակրոնները նրան պետք է բացատրեն, որ ժամանակը սպառվել է, որ Նիկոլն իր սև գործն արեց ու Զելենսկու հետ պետք է մտածի սեփական կաշվի փրկության մասին»։

***

Քաղաքագետ Սուրեն Սուրենյանցի ֆեյսբուքյան գրառումը․ «Հայաստանում Ֆրանսիայի արտակարգ և լիազոր դեսպան Օլիվիե Դըկոտինյին բացառիկ հարցազրույց է տվել «Ռադիոլուրին»:
Ի թիվս այլ հարցերի, նա հպանցիկ անդրադարձել է նաև ԼՂ խնդրի կարգավորմանը՝ անելով խիստ վիճահարույց մի հայտարարություն:
«... Նրանք, ովքեր պնդում են, թե Լեռնային Ղարաբաղն Ադրբեջանի մաս է ճանաչվել 2022 թվականին Պրահայում, ստում են, որովհետև Լեռնային Ղարաբաղը Հայաստանի կողմից Ադրբեջանի մաս է ճանաչվել Ալմա Աթայի հռչակագրի պահից սկսած»,- ասել է դեսպանը:
Ստում է կամ խնդրից անտեղյակ է հենց դեսպանը ու այս փաստը տարակուսելի է հատկապես այն պատճառով, որ Ֆրանսիան ԵԱՀԿ ՄԽ երեք համանախագահ երկրներից մեկն է:
Եթե ԼՂ կարգավիճակը 1991-ից կանխորոշված է եղել, ապա ո՞րն է եղել ԼՂ խնդրի կարգավորման գործընթացի իմաստը, մանավանդ, որ միջնորդների ներկայացրած շուրջ մեկ տասնյակ տարբերակներից ընդամենը մեկն է (Ընդհանուր պետության տարբերակը) կանխորոշել ԼՂ կարգավիճակը, մնացած բոլոր տարբերակներում այդ խնդիրը թողնվում էր ապագային (էլ չասեմ այն մասին, որ Մեղրիի տարբերակով անգամ քննարկվել է ԼՂ-ի Հայաստանին միացման հնարավորությունը):
Անգամ Նոյեմբերի 9-ի եռակողմ հայտարարության տեքստում ԼՂ կարգավիճակը կանխորոշված չի եղել ու, այո, այն ունիտար Ադրբեջանի մաս է ճանաչվել հենց Պրահայում` 2022թ-ի հոկտեմբերի 6-ին:
Նիկոլ Փաշինյանը Հայաստանի առաջին ղեկավարն էր, որ փաստացի Ադրբեջանը ճանաչեց Ադրբեջանի մաս՝ հայտարարելով, թե այդ հարցում կոնֆլիկտ չունի Ադրբեջանի հետ:
Երբ Փաշինյանը նենգափոխում է պատմությունն՝ ամեն ինչ բարդելով Ալմա-Աթայի հռչակագրի կամ 1994-ի վրա, հասկանալի է. նա գիտակցված գնացել է Արցախի կործանմանը ու հիմա «մեղավորներ» է նշանակում՝ պատասխանատվությունից խուսափելու համար:
Իրականության դեմ կռիվ տալու լուրջ մոտիվներ կամ շարժառիթ ունի նաև դեսպան Օլիվիե Դըկոտինյին, որի նախագահ Մակրոնը Պրահայի քառակողմ հայտարարության «կնքահայրերից» մեկն էր:
Պարագան ճանապարհ էր բացում Արցախի կործանման համար:
Փարիզն ու Բրյուսելը հայ ժողովրդի թշնամիները չեն, սակայն նրանք ունեն իրենց աշխարհաքաղաքական շահերը, որոնք թելադրում էին ռուսական ազդեցության թուլացում մեր տարածաշրջանում:
Հենց Մակրոնն ու Միշելը քաջալերեցին Փաշինյանը «ստրատեգիական ռեվերսը», ինչի հետևանքը դարձավ Արցախի կործանումը:
Հիմա հարգարժան դեսպանը փրկում է իր նախագահի ռեպուտացիան...»։