ԱԺ նախկին պատգամավոր Նաիրա Զոհրաբյանը ֆեյսբուքյան իր էջում գրում է․

Դուք իդիոտ եք, պարոնայք

Քիչ առաջ ֆեյսբուքը հեռացրեց հունիսի 2-ին տեղադրած իմ նյութը՝ այն համարելով իրենց կանոնների կոպտագույն խախտում։

Իսկ գիտե՞ք ես ինչ էի տեղադրել, որը խախտել է ֆեյսբուքի սուրբ կանոնները. ես հունիսի 2-ին տեղադրել է ընդամենը Բագրատ Սրբազանի նկարն ու արել երեւի ֆեյսբուքի համար «մահացու» մակագրություն։ Նկարի վերեւում ես գրել էի՝ «Սրբազանը»։ Վերջ։ Այսքանը։ Երդվում եմ։ Բագրատ Սրբազանի նկարն ու մեկ բառ՝ «Սրբազանը»։

Ես չեմ հավատում, որ ֆեյսբուքի արհեստական ինտելեկտը երեկ խմած, կամ՝ պլան քաշած է եղել, որ հոգեւոր հոր նկարն իր արհեստական ուղեղի աչքին սպառնալիք է երեւացել։ Ակնհայտ է, որ էստեղ կա մարդկային գործոն եւ էդ մարդկային թաթը Հայաստանից է։

Մի ժամանակ հանրային գործիչների, լրատվամիջոցների ֆեյսբուքյան էջերը «մոնիտորինգ» էր անում եւ ֆեյսբուքին «իրազեկում» իշխանություններին ոչ հաճելի կոնտենտի մասին, Մեդիանախաձեռնությունների՝ Media.am կենտրոնը, ինչի արդյունքում ազատ խոսքը ֆեյսբուքում գրեթե ոչնչացվեց։

Հիմա տեղեկացանք, որ ֆեյսբուքի համար այդ մոնիտորինգը պիտի իրականացնի «Սիվիլնեթը»։

Ես չգիտեմ՝ իմ էջից Սրբազանի նկարը հեռացնելը արդյո՞ք «CivilNet»-ի տրամարդած «մոնիթորինգի» հետեւանք է, թե՝ ոչ, բայց եթե էդպես է ու իրենք որոշել են ստախանովյան էնտուզիազմով տալ-անցնել իրենց խիստ տխրահռչակ նախորդին, սա արդեն շատ լուրջ ահազանգ է։

Տեղեկացա, որ լրատվամիջոցների ֆեյսբուքյան էջերից ձեռքի հետ հեռացնում են անգամ պաշտոնական լրահոսը, պարզապես լրատվամիջոցի էջը վնասելու, դիտելիությունը գցելու համար։

Սա լուրջ խնդիր է։ Ու քանի դեռ ձեր ֆեյսում տեղադրված, ասենք, կարմիր կամ սեւ վարդի նկարն էլ Հայաստանում նստած, «մոնիթորինգ» անող ռեժիմի ինչ-որ մի կամակատարի պատճառով չի հանվել՝ հիմնավորմամբ, թե վարդը հիշեցնում է անգլիական խոշոր երկու դինաստիայի՝ լանկաստերների եւ յորքերի միջեւ 1455-1485 թվերին տեղի ունեցած արյունալի բախումը, հանրային-լրատվական դաշտը շատ արագ պիտի արձագանքի այս խայտառակ, լկտի պատերազմին՝ ընդդեմ ազատ խոսքի։

Հ.Գ. Հուսամ՝ էս նկարս չի խախտում ֆեյսբուքի էթիկայի նորմերը։