Նա, ով իրեն մտավորական է համարում, վեր կկենա և կգա Ազատության հրապարակ, եթե դեռ չի եկել, ապա ոչ մի կոչ էլ նրան այստեղ չի բերի, այս մասին Ազատության հրապարակում ասել է դերասան Հրանտ Թոխատյանը։ «Այ երբ կհասունանա, այդ ժամանակ էլ կգա»,– ասել է նա։
Դերասանը նշել է, որ Արցախը Ադրբեջանի չտալը դարձել է համար մեկ հարցն այսօր։ «Մենք մեր երկիրը տալու չունենք։ Ինչպես դա կանի մարդը, որն այսօր իբր ղեկավարում է, դա իր խնդիրն է, թող դիմի օգնության և լուծի այդ հարցը։ Եթե չի կարողանում, թող գնա, գան մարդիկ, որոնք կկարողանան այդ հարցը լուծել։ Կհարցնեք՝ ո՞վ, չեմ կարող պատասխանել, բայց հաստատ կան այդ մարդիկ, կան շատ խելացի մարդիկ»,– ասել է նա։
Դերասանն ասել է, որ այսօր բոլորը պետք է մի կողմ դնեն իրենց գաղափարական տարաձայնությունները և միավորվեն ի շահ Արցախի պաշտպանության․ «Դա է այսօր կարևորը, պետք է միավորվել, ու այս հրապարակը պետք է լցվի»։
Հարցին, թե 1988-ին, երբ Արցախը կորցնելու վտանգ կար, ինչու էր շատ մարդ ոտքի կանգնում, իսկ այսօր, երբ նույն վտանգը նորից կա, ավելի քիչ մարդ է դուրս գալիս փողոց, դերասանը պատասխանել է․ «Այսօր մեծացել է մի սերունդ, որը նեյտրալ է վերաբերվում իր երկրին, միգուցե տանը նստած ցավում է իր երկրի համար, բայց ոչ այնպես, որ այդ ցավն իրեն բերի այստեղ ու ինքն իր կարծիքն ասի Արցախի մասին»։
Դիտեք նաև՝
