Երեկ «Առաջին լրատվականով» հեռարձակվող «Հարցազրույց» հաղորդաշարի եթերում ԱԻՄ նախագահ, նախագահի նախկին թեկնածու Պարույր Հայրիկյանը Երևանի ավագանու անդամ Ստյոպա Սաֆարյանին ողորմելի էր անվանել:
Այսօր, Մեդիա կենտրոնում, անդրադառնալով Պարույր Հայրիկյանի երեկվա զրույցին` Երևանի ավագանիում «Բարև Երևան» դաշինքի ներկայացուցիչ Ստյոպա Սաֆարյանն ասաց, որ ցավում է, որ քաղաքական գործիչը, ում 15- 16 տարեկանի աչքերով այլ կերպ էր նայում, այսօր իր աչքի առջև հառնել է ողջ մերկությամբ, քանի որ հանրային լսարանի առջև արտահայտվելիս բարեկրթություն և տակտ չունի` բառեր ընտրելու, արտահայտչամիջոցների դիմելու առումով:
«Պարույր Հայրիկյանի շատ քայլեր հանրությանը հասկանալի չեն և այստեղ հանրությունը մեղավոր չէ, ով քննարկում է հանրային գործչի վարքը` բացատրություններ ստանալու նպատակով: Բուռն, կոշտ ռեակցիան հասկանալի կլիներ, եթե հանրությունը հետաքրքրվեր Հայրիկյանի լոգարանով: Հանրությունը մեղավոր չէ, որ իր շորերին կրակոցի հետք չկա, հանրությունը մեղավոր չէ, որ նա նախաճաշին, ճաշին, ընթրիքին որոշումներ է փոխում: Ես անձնական վիրավորանք չեմ հասցրել չեմ էլ հասցնելու նրան, պարզապես իմ ներսում քաղաքական էլիտայի հետ կապված բարձունքները փլուզվում են»,-ասաց Ստյոպա Սաֆարյանը` մանրամասնելով.
«Միջադեպը սկսվել է նրանից, որ Դավթաշենից նստեցի տաքսի, իսկ վարորդը հարցրեց, թե դուք փարթիից ե՞ք գալիս: Իզուր չէ, որ ժողովուրդն ասում է մատղ-փարթի, քանի որ մատաղը երեկոյան չի լինում: Հետո Հայրիկյանն ասաց, որ փարթի չի եղել, մատաղ է արել»:
