ՀԱԿ պատգամավոր՝ Լևոն Զուրաբյանի՝ Ֆինանսների նախարարի տեղակալ Ատոմ Ջանջուղազյանին ուղղված հարցը վերաբերում էր Կառավարության կատարած կամ չկատարած ծախսերին:
«Կառավարությունը մեզ մատուցել է մի շատ տարօրինակ անակնկալ, մի հանելուկ, որի պատասխանը չեմ գտնում: Պարզվում է, որ ԿԲ կառավարության հաշվին առ 31.12.2013թ., գտնվել է 189 միլիարդ դրամ, մինչդեռ բյուջեի ծախսային մասը թերակատարվել է: Հաճախ տեսնում ենք իրավիճակ, երբ կառավարությունները չեն կարողանում եկամտային մասն ապահովել, բայց մտնում են մեծ ծախսերի մեջ:
Առեղծվածի էությունը հետևյալն է: Իրականում դուք հավաքել եք փողը, դեռ մի բան էլ ավելի, քան պլանավորված էր, բայց չեք ծախսել: Ընդ որում, չծախսելը լուրջ հիմնավորված չէ: Սոցիալական պաշտպանության հետ կապված ծախսեր կան, 77 տոկոսն է ընդամենը ֆինանսավորվել: Սա ի՞նչ է նշանակում: Ինչո՞ւ այդ ծախսերը չեն կատարվել: Լավ, սոցիալական պաշտպանությունը մի կողմ թողնենք, ասում էին՝ ինչ-որ ծրագրեր պետք է կատարվեին, բայց կառավարությունը չկարողացավ ծախսերը կատարել, դեռ մշակված չէին: Ի՞նչ էր եղել, բերեիք ԱԺ, արագ փոփոխություն անեինք, որ այդ փողերը ներդրվեին: Անհասկանալի պատճառներով կառավարությունը չի կատարել ծախսեր, չի նպաստել ՀՆԱ-ի աճին և բավականին լուրջ գումար մնացել է անհայտ կամ հայտնի մի տեղում, բայց անհայտ նպատակներով»,-ասաց պատգամավորը:
Նրա հաջորդ հարցը վերաբերում էր ռուսական վարկին: «Ինչպե՞ս եղավ, որ 3.5 տոկոսանոց ռուսական վարկը փոխարինվեց 6.25 տոկոսադրույքով պարտատոմսերով և ինչպես են ծախսվել ռուսական վարկի միջոցները»:
Ատոմ Ջանջուղազյանը պատասխանեց, որ առեղծված չկա, 189 միլիարդ դրամը վերաբերում է գանձապետական միասնական հաշվում առկա դրամական միջոցներին:
«Դա օրենքով բացված դրամական արտահայտության հաշիվ է, որը գտնվում է կենտրոնական բանկում: Զարմանալի ոչինչ չկա, որ այդտեղ կարող է լինել մնացորդ»,-նշեց նա:
Անդրադառնալով ռուսական վարկին՝ Ֆինանսների նախարարի տեղակալը պատասխանե, որ խոսքը չի վերաբերում ինչ-որ 3.5 տոկոսանոց ռուսական վարկը 6.25 տոկոսով փոխարինելուն:
«ՌԴ-ից մեր պարտավորությունն ունեցել է լողացող տոկոսադրույք»,-հավելեց Ատոմ Ջանջուղազյանը:
Լևոն Զուրաբյանը նկատեց, որ ընդունում են որոշումներ, որոնք վնասում են երկրին:
«Մի երկրում, որտեղ փողի պակաս կա, այդ փողը ոչ ոք չի ծախսում: Կարո՞ղ եք բացատրել այդ առեղծվածը»,-հարցրեց պատգամավորը:
«Յուրաքանչյուր տարվա մեջ ընտ ամիսների, ըստ եռամսյակի, ունենք սեզոնայնության գործոն, որը ինչ-որ մի եղանակով պետք է հարթել: Գործիքները շատ չեն»,-եղավ պատասխանը:
