«Այս ընթացքում շատ կարևոր ձեռքբերում ունեցանք՝ առաջինը մեր ազգի մոբիլիզացիան է.հավատացած եմ, որ հազարավոր հայեր ազգային գիտակցության որոշակի փոփոխություն ունեցան, դա շատ կարևոր է: Մեր հարցը դարձավ համաշխարհային քաղաքակրթության հարց: Բայց սա չպետք է կապել իրական քաղաքականության հետ: Տարածված կարծիք կա, որ քաղաքականությունը շախմատ է, բայց այն թատրոն է. կան ներքին և արտաքին խաղացողներ: Շատ կարևոր էր, որ համաշխարհային երկու դերակատար կարևոր հայտարարություն արեցին՝ Օլանդն ու Պուտինը հիշատակեցին Անտանտի հայտարարությունը, որը դատապարտում էր Օսմանյան Թուրքիայում տեղի ունեցած հայերի ոչնչացումը և այդ հայտարարությամբ հայերի նկատմամբ իրականացրած հանցագործության համար պատասխանատու համարում էին Թուրքիայի կառավարությանը»,-այսօր՝ լրագրողների հետ հանդիպման ժամանակ խոսելով Հայոց ցեղասպանության 100-րդ տարելիցի միջոցառումների և արձագանքների մասին՝ ասաց քաղաքագետ Լևոն Շիրինյանը:
Քաղաքագետի խոսքով՝ Հայկական հարցը վերադառնում է բարձր հնչողությամբ:
«Պետք է վերակազմակերպել Հայաստանը: Մենք հիմա նախապատրաստական փուլ պետք է անցնենք.գիտական, տրամաբանական: Հիմքում պետք է լինի ՀՀ ազգային շահը»,-նշեց նա:
Անդրադառնալով ԱՄՆ-ի կողմից «ցեղասպանություն» տերմինը կրկին չօգտագործելուն՝ Լևոն Շիրինյանը նկատեց.
«ԱՄՆ-ի կողմից չափազանց մեծ ճնշումը Թուրքիայի վրա՝ նրան մղելու է Ռուսաստանի գիրկը: Մենք ԱՄՆ-ից առաջին հերթին ՀՀ-ի և ԼՂՀ-ի անվտանգության երաշխիքներ պետք է պահանջենք՝ Թուրքիայի վրա ճնշում գործադրելով: Եվ նրանք դա կանեն: Հետո՝ տնտեսական աջակցություն պետք է լինի»:
Անի Կարապետյան
