«Ոչ վաղ անցյալում տեղի ունեցան սահմանադրական փոփոխություններ, ընդունվեց նոր Ընտրական օրենսգիրք, արդյունքում ստեղծվեցին նոր իրողություններ: Տարաբնույթ բանակցություններ էին ընթանում տարբեր քաղաքական ուժերի միջև և այդ գործընթացի ժամանակ բանակցել ենք նաև Գագիկ Ծառուկյանի հետ ու տեսել որոշակի մոտեցումների նմանություններ»,-լրագրողների հետ հանդիպման ժամանակ խոսելով «Ծառուկյան» դաշինքին միանալու ՀՀՇ-ի որոշման մասին՝ ասաց ՀՀՇ վարչության անդամ, «Ծառուկյան» դաշինքի ընտրական ցուցակով առաջադրված Արարատ Զուրաբյանը:
Ինչ վերաբերում է նախկին ՀՀՇ-ական Ալեքսանդր Արզումանյանի որոշմանը՝ դադարեցնել կուսակցական գործունեությունը, պարոն Զուրաբյանը նկատեց. «Նա եղել և շարունակում է մնալ իմ ընկերը, բայց լիբերալները բոլոր հարցերում չէ, որ միասնական տեսակետ են ունենում, ես հարգում եմ իր որոշումը»:
ՀՀՇ վարչության անդամի կարծիքով՝ «Ծառուկյան» դաշինքը կարող է ստանալ իր քվեները, փորձել ձևավորել մեծամասնություն.
«Արդյունքում տեղի կունենա բոլորի կողմից սպասված իշխանափոխությունը, որը նախորդ անգամ ոչ ոքի չէր հաջողվել իրականացնել: Գագիկ Ծառուկյանը ցանկանում է երկրում փոփոխություն իրականացնել, ուզում է, որ ՀՀԿ-ն չվերարտադրվի մշտապես»,-նշեց Արարատ Զուրաբյանը:
Նրա դիտարկմամբ ՀՀ օրենքները թույլ են տալիս քաղաքական ուժերին ձևավորել մեծամասնություն և գալ իշխանության՝ առանց որևէ հեղափոխության:
Ինչ վերաբերում է դաշինքներին, ապա Արարատ Զուրաբյանի կարծիքով, դրանք քաղաքական չեն.
«Չեմ տեսնում կուսակցությունների, որոնք վառ գաղափարական պայքար են տանում»,-ասաց նա:
