Քիչ առաջ ավարտված ՀՀԿ ԳՄ նիստից հետո լրագրողների հետ հանդիպման ժամանակ ՀՀԿ խոսնակ Էդուարդ Շարմազանովը ասել է, որ ԱԺ ՀՀԿ խմբակցության պատգամավոր Հրայր Թովմասյանն առաջադրվել է Սահմանադրական դատարանի անդամի պաշտոնում։
Նրա խոսքով, Թովմասյանը վաղը հրաժարականի դիմում կներկայացնի ԱԺ պետաիրավական հարցերի հանձնաժողովի նախագահի պաշտոնից։ «Այս ժամանակահատվածում ավելի նպատակահարմար կլինի, որ չհամատեղվի այդ պաշտոնները»,- նշել է Շարմազանովը։
Հանրապետական կուսակցությունը որոշել է հանձնաժողովի նախագահի պաշտոնում առաջադրել Գեւորգ Կոստանյանի թեկնածությունը։ «Պարոն Կոստանյանը կարող է դրականորեն ներկայացնել այդ հանձնաժողովը, ունի մեծ փորձ թե դատախազությունում, թե զինվորական դատախազությունում»,- ասել է Շարմազանովը։
Իսկ հարցին, թե եթե Հրայր Թովմասյանը վայր դնի պատգամավորական մանդատը, ով կփոխարինի նրան, Շարմազանովն ասել է, որ Հրայր Թովմասյանն առայժմ վայր չի դնում մանդատը, այլ ընդամենը հրաժարվելու է ղեկավարել Պետա-իրավական հարցերի հանձնաժողովը, իսկ ՀՀԿ ցուցակում հաջորդը Տաճատ Վարդապետյանն է:
