«Մեր հանրությունն այնքան էր ոգեւորվել «ոմն անձից» 100 լսողական սարքերի տրամադրմամբ՝ ասես մեր պետությունը դրա կարիքն ունեցող քաղաքացիներին երբեք լսողական սարքեր չէր տրամադրել»:
2017 թվականի բյուջեի կատարողականի քննարկումների ժամանակ նշել է ՀՀԿ-ական պատգամավոր Մարգարիտ Եսայանը՝ դիմելով աշխատանքի և սոցիալական հարցերի նախարար Մանե Թանդիլյանին ու նախարարին խնդրել է թվեր ներկայացնել՝ հաշվետու ժամանակահատվածում նախարարությունը քանի լսողական սարք է տրամադրել:
Մարգարիտ Եսայանն ակնարկում էր Էլթոն Ջոնի այցին:
«Վերջին շրջանում սոցցանցերում մենք անհասկանալի ոգերություն էինք տեսնում ընդամենը ոմն անձի՝ 100 լսողական սարքերի տրամադրման առիթով: Մեր հանրությունն այնքան ոգեւորված էր՝ ասես պետությունը երբեք դրա կարիքն ունեցող քաղաքացիներին լսողական սարքեր չէր տրամադրել: Ես Ձեզ խնդրում եմ հարցը Ձեր ձեռքը վերցնել, քանի որ որպես հանձնաժողովի անդամ, ես գիտեմ, որ պետությունը լուրջ պարտավորություններ ունի եւ դրանք կատարում է: Այդ 100 լսողական սարքերը որքանո՞վ են թեթեւացրել նախարարության պարտավորությունները»,- հարցրել Մարգարիտ Եսայանը:
Ըստ Մանե Թանդիլյանի, ներկայումս նախարարությունը հաշմանդամությամբ մարդկանց անհրաժեշտ սարքավորումների տրամադրման նոր եղանակ է ներդնում՝ սերտիֆիկատներով: Մասնավորապես՝ այդ եղանակն արդեն ներդրվել է հաշմասայլակներ ստանալու համար, դրանով տարբեր կազմակերպություններ են զբաղվում, եւ այս հարցով քաղաքացիների գանգատները մեծապես կրճատվել են:
Նախարարը հավելել է, որ քաղաքացիների հետ հաղորդակցությունն ընդհատվում է, երբ նրանց սարքեր են տրամադրվում, որոնք իրենք չեն ընտրել, եւ նրանց անհարմար է դրանք կրել: Նրա խոսքով՝ անհրաժեշտ է տարբեր կազմակերպությունների մասնակցությամբ մրցույթներ անցկացնել, անհրաժեշտ է որակի մոնիթորինգ, սակայն միանշանակ է, որ հարցի լուծումը սերտիֆիկատներն են:
Մարգարիտ Եսայանը նշել է, որ այդ էյֆորիայի վիճակում շատ մարդիկ կլինեն, որոնք կգան ու կհայտարարեն այն մասին, որ 10-20-100 սարք են նվիրել: «Ես՝ որպես պետության ներկայացուցիչ եմ դիմում Ձեզ, որպեսզի դուք ունենաք պատվախնդրություն այս հարցում: Եվ որ Դուք թվեր ներկայացնեք, թե բյուջեի շրջանակում քանի սարք է տրամադրվում: Նվիրատվություններ շատ կլինեն, սակայն չեմ կարծում, որ պետք է այդ մասին այնպես թմբկահարել՝ իբր մենք այնքան կորած մոլորած երկիր ենք, որ երբեք լսողական սարք չենք տեսել»,- ասել է նա, ինչից հետո Մանե Թանդիլյանը հավաստիացրել է, որ նախարարության բոլոր քայլերը բխելու են քաղաքացիների շահերից, այդ թվում՝ եթե բարեգորությունը բխում է քաղաքացիների շահերից, այն նույնպես տեղ կունենա:
