ՀՀ վարչապետ Նիկոլ Փաշինյանը ֆեյսբուքյան իր էջում՝ ուղիղ եթերում պատասխանել է օգտատերերի հարցերին:
Հարցեր եղան Պարտադիր կուտակային համակարգի, սահմանին շարունակ զոհեր ունենալու, ժողովրդի՝ վարկերի ծանրաբեռնվածության, արագաչափերի եւ տեսախցիկների, հանքերում իրականացվող ստուգումների մասին:
Վարչապետը բավական երկար պարզաբանել է Պարտադիր կուտակային համակարգի մասին իր ու կառավարության դիրքորոշումը:
Սահմանին զոհեր ունենալու մասին հարցին, վարչապետը նշեց, որ ամեն նման դեպքից հետո իր հանձնարարականը շատ հստակ է՝ անել նորմալ քննություն ու պարզել հանգամանքները:
«Ես կիսում եմ ձեր կարծիքը, բայց գիտեմ, որ այս կիսապատերազմական իրավիճակում հնարավոր չէ, որ չլինեն զոհեր: Ցավալի դեպքեր են տեղի ունենում, բոլոր դեպքերն են ցավալի, չեմ ուզում մանրամասների մեջ խորանալ, բայց իմ դիրքորոշումն այսպիսին է, որ մենք անում ենք ամեն ինչ՝ զինվորների կյանքը պաշտպանելու համար»:
Արագաչափերի եւ տեսախցիկների մասին հարցին պատասխանելով, վարչապետը նշեց, որ այդ վարչական տույժերը պետք է մարդկանց գրպանին համապատասխան լինեն, աշխատավարձերին համարժեք, իսկ եթե տուգանքներն անտեղի են, ապա պետք է բողոքարկել՝ այդ ամենին վերջ դնելու համար:
Անդրադառնալով ժողովրդի՝ վարկերի ծանրաբեռնվածության մասին հարցին, Փաշինյանը նշեց, որ ինքը հավատարիմ է մնալու վարկերի բեռը թեթեւացնելու մասին իր տված խոստմանը:
Ֆուտբոլի աշխարհի առաջնության բացմանը մասնակցելու համար Ռուսաստանի Դաշնություն մեկնելու մասին հարցին, նա ասաց, որ ընդունել է նախագահ
Պուտինի հրավերն ու վաղը մեկնելու է Մոսկվա, որտեղ նախատեսված է նաեւ աշխատանքային հանդիպում Վլադիմիր Պուտինի հետ:
