Այսօր տեղի ունեցավ Երևանի ավագանու հերթական նիստը, որի օրակարգում կար 8 հարց: Նիստը, սակայն, վարել է ոչ թե քաղաքապետ Տարոն Մարգարյանը, այլ՝ փոխքաղաքապետ Կամո Արեյանը:
Պատճառը, ինչպես նշել է փոխքաղաքապետը, Տարոն Մարգարյանի առողջական խնդիրներն են:
Օրակարգում քննարկվող 8 հարցերից 5-ը վերաբերել են Երևան քաղաքի սեփականություն համարվող բնակարանն անհատույց տարբեր անձանց օտարելուն:
Մեկ այլ հարցով նախատեսվել է հաստատել Երևան համայնքի սեփականություն համարվող 50 տոկոսից ավելի բաժնեմաս ունեցող փակ բաժնետիրական ընկերությունների 2017-ի տարեկան գործունեության արդյունքներով առաջացած զուտ շահույթի բաշխման ուղղությունները և Երևանի բյուջե վճարման ենթակա շահութաբաժինների չափերը:
Նիստի ընթացքում Կամո Արեյանն անդրադարձել է նաև օրերս համացանցում շրջանառվող լուրերին, ըստ որոնց՝ Տարոն Մարգարյանը հրաժարական կտա, ինչպես նաև պատասխանել է «Ելք» խմբակցության ղեկավար Դավիթ Խաժակյանի այն հարցին, թե որքան դեռ պետք է շարունակի գործել այս ավագանին.
«Տարոն Մարգարյանի հրաժարականի հարցով մենք մտահոգ ենք, այս փակ գործելաոճը չպետք է շարունակվի: Ես որևէ հարցում շտապողականություն չեմ ցուցաբերում, բայց գոնե Երևան համայնքի քաղաքացիները իրավունք ունեն իմանալու, թե դեռ որքան պետք է գործի այս ավագանին և քաղաքական ուժերն էլ պետք է հասկանան ինչ ժամկետներում առաջադրումներ կատարել»,- ասել է Կամո Արեյանը: