Ադրբեջանն ու Բելառուսն այսօր փոխշահավետ երկկողմ համագործակցության զարգացման շրջանակում սպառազինությունների և հակաօդային պաշտպանության տեխնիկայի մատակարարումների շուրջ հռչակագիր են ստորագրել: Այս մասին փոխանցում է Белта-ն:
«Ամենակարճ ժամանակահատվածում հռչակագիրը Բելառուսից Ադրբեջան ռազմատեխնիկայի հերթական խմբաքանակի ձեռքբերման շուրջ պայմանագրի կվերածվի»,- Մինսկում ասել է Ադրբեջանի նախագահ Իլհամ Ալիևը:
Նրա խոսքով՝ Ադրբեջանը «գոհ է այդ ոլորտում Բելառուսի հետ համագործակցությունից, քանի որ բելառուսական արտադրանքը որակյալ է և արդյունավետ»:
Հիշեցնենք, որ այսօր Մինսկում կայացած բանակցությունների ընթացքում Ալիևն իր երախտագիտությունն էր հայտնել Բելառուսի նախագահ Ալեքսանդր Լուկաշենկոյին՝ ԼՂ հարցով դիրքորոշման համար: ԱԼիևը նշել է, որը Բելառուսի և Ադրբեջանի համագործակցության բոլոր ուղղություններում կոնկրետ արդյունքներ կան: Նրա խոսքով՝ «այն, ինչի շուրջ երկու երկրները պայմանավորվել են, իրականացրել են», և որ «Ադրբեջանն ու Բելառուսը միմյանց աջակցել են միջազգային բոլոր կառույցներում»:
