«Եվրոպայի խորհուրդն աջակցում է ՀՀ ժողովրդավարացման գործընթացին, մենք վերահաստատում ենք դա»,-ՀՀ ԱԺ-ում լրագրողների հետ ճեպազրույցում այսօր հայտարարեց ԵԽԽՎ նախագահ Լիլիան Մորի Պասքիեն: «Միաժամանակ, խնդիրների մասին պետք է բարձրաձայնեմ: Այդ հարցերի առաջ է կանգնած Եվրոպան: Խոսքը բռնությունների, ատելության խոսքի, կանանց եւ տղամարդկանց իրավահավասարության տարանջատման, ազգայնականության քարոզի մասին է: Այս ամենը մարտահրավերներ են Եվրոպայի համար: Համատեղ պետք է պայքարենք նման երեւույթների դեմ, որպեսզի ունենանք խաղաղ մայրցամաք»,-նշեց ԵԽԽՎ նախագահը:
ՀՀ ԱԺ նախագահ Արարատ Միրզոյանի և ԵԽԽՎ նախագահ Լիլիան Մորի Պասքիեի ճեպազրույցը` տեսանյութում
Հավելենք, որ ԵԽԽՎ նախագահ Լիլիան Մորի Պասքիեն այցելել է Ծիծեռնակաբերդի հուշահամալիր:
Բարձրաստիճան հյուրը ծաղիկներ է խոնարհել անմար կրակի մոտ, հարգել Հայոց ցեղասպանության Սուրբ նահատակների հիշատակը:
Լիլիան Մորի Պասքիեն եղել է նաեւ Հայոց ցեղասպանության թանգարան-ինստիտուտում, ծանոթացել ցուցանմուշներին, գրառում կատարել հուշամատյանում:
ԵԽԽՎ նախագահը նշել է, որ այսօր էլ դեռ իրականացվում են ցեղասպանություններ եւ պետք է պայքարել ատելության, այլատյացության եւ խտրականության դեմ: «Դրանք հանգեցնում են հանցագործությունների եւ դեմ են մարդու իրավունքներին, արժանապատվությանը»,- ասել է Լիլիան Մորի Պասքիեն:
