Հայ արվեստասեր հասարակությունը ապրիլի 25-ից հունիսի 2-ը եզակի հնարավորություն կունենա ծանոթանալ իտալական ժամանակակից արվեստի ամենավառ ներկայացուցիչներից մեկի՝ համաշխարհային համբավ վայելող գեղանկարիչ, քանդակագործ, գրաֆիկ Բրունո Բրունիի աշխատանքներին: Ցուցադրությունը տեղի կունենա Հայաստանի Ազգային պատկերասրահում:
1959 թվականից ի վեր՝ Բրունո Բրունին անհատական ցուցահանդեսներ է ունեցել աշխարհի շատ քաղաքներում, այդ թվում՝ Ամստերդամում, Բեռլինում, Բրյուսելում, Քյոլնում, Լոնդոնում, Միլանում, Նյու Յորքում, Հռոմում, Տոկիոյում... նրա գեղանկարները, քանդակներն այսօր ներկայացված են Եվրոպական ժամանակակից արվեստի ամենահեղինակավոր թանգարաններում և անհատական հավաքածուներում: Ուստի արվեստագետի ներկայությունը Հայաստանում նոր շունչ կհաղորդի հայաստանյան մշակութային կյանքին:
Ցուցադրությունը «Անտիկյան» ցուցասրահի և «Ռենկո Արմէստեյտ» ընկերության շարունակական համագործակցության շրջանակներում է` ևս մեկ կարևոր քայլ հայ-իտալական մշակութային երկխոսության մեջ:
Աշխարհի շուրջ 10 երկրներում մասնաճյուղեր ունեցող «Ռենկո Արմէստեյտ» ՍՊԸ-ն հայտնի է տարբեր նախագծերով: Ամենատարբեր ոլորտներում գործունեություն իրականացնելու հետ մեկտեղ՝ «Ռենկո Արմէստեյտ»-ն իր միջոցներն ուղղում է նաև մշակույթին՝ ներդրումներ կատարելով նաև այս ոլորտում և նպաստելով մշակույթի միջազգայնացմանը:
« «Ռենկո Արմէստեյտ» ՍՊԸ-ն բավական երկար ժամանակ է՝ գործունեություն է ծավալում Հայաստանում՝ 1998-1999 թվականներից սկսած: Սկզբնական շրջանում աստիճանաբար սկսեցինք ինտեգրվել Հայաստանին, գործունեություն ծավալել մի շարք ոլորտներում` այդ թվում և մշակույթի ոլորտում: Սա մեր առաջին նախաձեռնությունը չէ: Մենք Իտալիայում ևս հայ հեղինակների աշխատանքների ցուցադրություններ ենք կազմակերպել: Այժմ էլ կազմակերպում ենք նշանավոր իտալացի գեղանկարիչ, քանդակագործ Բրունո Բրունիի ցուցահանդեսը Հայաստանում: Նա հենց այն պրովինցիայից է, որտեղ հիմնադրվել է մեր ընկերությունը: Հայտնի քանդակագործներ և նկարիչներ ունենք, և մեզ համար մեծ պատիվ է նրանց ներկայացնել նաև Հայաստանում՝ Արմինե Անտիկյանի օգնությամբ»,- ASEKOSE.am-ի թղթակցի հետ զրույցում ասաց «Ռենկո Արմէստեյտ» ՍՊԸ-ի ղեկավար Ասլան Դիշեկովը:
Համագործակցության մեկնարկը 2012-ին էր, երբ Իտալիայի Պեզարո քաղաքի Պերկերիա թանգարանում մեկ ամիս ցուցադրվեց «Դրախտը որոնելիս» խորագրով հայկական ցուցահանդեսը։
«Մեր համագործակցությունը «Ռենկո Արմէստեյտ»-ի հետ սկսվել է 2 տարի առաջ: Ընկերությունը 5 հայ արվեստագետների հրավիրեց Պեզարո քաղաք, որտեղ լավագույն թանգարանում ներկայացվեցին նրանց աշխատանքները: Այս համագործակցությունը շատ պտղաբեր էր: Չափազանց կարևոր է, որ բիզնես ոլորտը ուշադրություն է դարձնում և հոգածություն է ցուցաբերում մշակույթի հանդեպ: Իմ կարծիքով՝ ժողովուրդների միջև ամենաուժեղ ու ամուր կապը հենց մշակութային կապն է»,-մեզ հետ զրույցում նշեց «Անտիկյան» ցուցասրահի ղեկավար Արմինե Անտիկյանը, ապա հավելեց.
« Կարծում եմ հայ և իտալացի ժողովուրդները շատ ընդհանուր գծեր ունեն: Երկուսն էլ համաշխարհային մշակույթի ամենաուժեղ կրողներից են՝ իրենց ավանդույթներով, և այս փոխադարձ մշակութային կապը ևս մեկ անգամ կապացուցի աշխարհին, որ մենք երկուսս էլ արվեստապաշտ ժողովուրդ ենք»:
Պեզարո քաղաքում ներկայացվել են արվեստագետներ Արարատ Սարգսյանի, Արա Ալեքյանի, Թենի Վարդանյանի, Սամվել Սաղաթելյանի, Սարգիս Համալբաշյանի աշխատանքները: Հայակական ժամանակակից արվեստը ջերմությամբ է ընդունվել Իտալիայում, և Բրունո Բրունիի ցուցահանդեսի կազմակերպումն այսպես ասած` պատասխան քայլն է:
Հայ-իտալական մշակութային համագործակցությունը կարևորում են թե հայկական, թե իտալական կողմերը.
Ասլան Դիշեկովի խոսքով՝
«Մենք միջազգային կազմակերպություն ենք, որը մասնաճյուղեր ունի աշխարհի ավելի քան տասը երկրներում: Դրանք զարգացող ու զարգացման հեռանկարներ ունեցող երկրներ են: Հայաստանում մեր ամենակարևոր մասնաճյուղերից մեկն է: Մենք այստեղ բավական մեծ թիվ ենք կազմում: Բացի բիզնես ոլորտից, փորձում ենք նաև նպաստել մշակույթի, արվեստի տարածմանը, միջազգային մշակութային համագործակցություններին: Մենք կոնկրետ հետաքրքրություններ չունենք, բացի նպաստելը, որ հայ-իտալական համագործակցությունը` թե մշակութային, թե այլ ոլորտներում ավելի ամրապնդվի ու զարգանա»:
Բրունո Բրունիի ցուցահանդեսը տեղի է ունենալու ՀՀ նախագահի բարձր հովանու ներքո: Բացի ցուցահանդեսից կազմակերպվելու է նաև մաստեր կլաս, ինչն Արմինե Անտիկյանի գնահատմամբ` չափազանց կարևոր է հայ արվեստագետների համար:
«Շատ կարևոր ու օգտակար է փորձը երիտասարդ քանդակագործների և նկարիչների համար: Ես որպես ցուցասրահի ղեկավար, կարծում եմ, որ մեր այսօրվա սերունդը շատ բան ունի սովորելու: Գուցե համացանցի ներգործությունն է պատճառը, շատերին թվում է՝ արդեն կայացած ու լուրջ արվեստագետնրե են, բայց աշխարհում կատարվող փոփոխությունների հետ առաջին հերթին հենց փորձի փոխանակման միջոցով են ծանոթանում »:
Ինչ վերաբերում է հայ-իտալական հետագա համագործակցությանը, Արմինե Անտիկյանի խոսքով`
«Կրկին «Ռենկո Արմէստեյտ»-ի հետ համագործակցությամբ արվեստագետների փոխանակման ծրագիրը կշարունակվի: Իմ ցուցասրահը համագործակցում է Իտալիայի հետ: Կան իհարկե ծրագրեր ՌԴ-ի և ԱՄԷ-ի հետ, սակայն ավելի շատ կարևորում եմ այս համագործակցությունը. Ըստ իս` իտալական մշակույթը «սնունդի» ամենալավ աղբյուրն է: Կարծում եմ՝ ցանկացած արվեստագետի համար իտալական արվեստը միակ սերն է: Մշակույթն այսօր ամենաբարձիթողի դաշտն է: Ոչ ոք այս ոլորտում ներդրում չի կատարում, չափազանց կարևոր է, որ կա մի կազմակերպություն, որն իր հոգածության տակ է վերցրել մշակույթը:Անգամ Երևան հյուրանցում ներկայացված են Հայ ժամանակակակից արվեստի նմուշներ, այսինքն` նույնիսկ այսկերպ մեր արվեստը պրոպագանդվում է»:
Ասլան Դիշեկովը կարևորում է նաև ՀՀ-ում Իտալիայի դեսպանության դերը՝ հատկապես կազմակերպչական հարցերում: Նրա խոսքով՝ դեսպանատան աշխատակիցները ոչ միայն իրենց դիվանագիտական առաքելությունն են իրականացնում, այլև մշակութային-երաժշտական միջոցառումներ են կազմակերպում:
Ցուցահանդեսի փակումը հունիսի 2-ին է, որը նաև Իտալիայի հանրապետության օրն է:
Նշանավոր իտալացի գեղանկարիչ, քանդակագործ Բրունո Բրունին ծնվել է 1935թ նոյեմբերի 22-ին՝ հ. 134 երկաթուղային տնակում, որը գտնվում է Պեզարոյի և Կատոլիկայի միջև։
1952-1959 թվականներին կրթություն է ստացել Պեզարո քաղաքի Ֆ. Մենգարոնիի անվան Արվեստի ինստիտուտում:
1961-1966 թվականներին մասնակցել է դասընթացների Համբուրգի արվեստի բարձրագույն դպրոցում, որտեղ նրան դասավանդել են հայտնի նկարիչներ:
Պարգևատրվել է «Ugolini» մրցանակով:
1959թ. տեղի է ունեցել նրա անհատական ցուցահանդեսը Պեզարո քաղաքի Ռոսսինի սրահում։
1960-ականներին արժանացել է «Lichtwark» մրցանակին՝ Օտտո Դիքսի և Էդգար Ագուստինի հետ համատեղ:
1977 թվականին արժանացել է «Senefelder» միջազգային մրցանակի:
2002-ից «Իտալիայի հանրապետության ասպետ» տիտղոսակիր է:
«Բրունո Բրունին համաշխարհային համբավ ունեցող արվեստագետ է: Նրա աշխատանքներն ընդգրկված են լավագույն թանգարաններում ու հավաքածուներում: Փայլուն գրաֆիկ է, գեղանկարիչ և քանդակագործ: Շատերը նրան համարում են ռեալիզմի կրող, բայց շատ էքսպերիմենտներ սիրող արվեստագետ է, սյուռեալիզմի հետ է խաղում, բայց սնվում է դասական իտալական արվեստից: Շատ հետաքրքիր է նրա թեմատիկան: Ապրելով երկու երկրների` Գերմանիայի և Իտալիայի միջև` երկու մշակույթները կրում է իր մեջ: Եվ անընդհատ այդ կապը նշմարվում է նրա արվեստում: Շատ նրբագեղ քանդակներ ունի, գրաֆիկական աշխատանքները, գեղանկարները: Հուսով եմ` հայ արվեստասերի համար սա շատ կարևոր ցուցահանդես կլինի»,-մեզ հետ զրույցում նշեց «Անտիկյան» ցուցասրահի տնօրեն Արմինե Անտիկյանը:
Հեղինակ` Հասմիկ Գյոզալյան
Ստորև ներկայացված են Բրունո Բրունիի երևանյան ցուցահանդեսի առիթով տպագրված գրքույկից մի քանի լուսանկարներ:
72157643857642333
