Երեկ, հունիսի 27–ին, Երևանում տեղի ունեցած «Luxury Group» ընկերության կողմից կազմակերպվող «Տարվա մարդիկ 2013» մարդասիրական բարեգործական նախագծի շրջանակում Երևանի քաղաքապետ Տարոն Մարգարյանին շնորհվել է  հատուկ մրցանակ` Երևան քաղաքի զարգացման գործընթացում մեծ ներդրում ունենալու համար: 

Մրցանակը ստանալու համար Երևանի քաղաքապետարանի աշխատակազմի մշակույթի և տուրիզմի վարչության տուրիզմի բաժնի պետ Մարիա Բարաղամյանը, ընթերցեց Երևանի քաղաքապետի ողջույնի խոսքը և փոխանցեց «Luxury Group» ընկերության հիմնադիր Էռնեստո Մարկոյին։

Ուղերձում մասնավորապես ասվում էր.««Տարվա մարդիկ» մրցանակաբաշխության հարգելի մասնակիցներ,կազմակերպիչներ և հյուրեր, 

Ողջունում եմ LUXURY GROUP-ի արդեն ավանդական դարձած ամենամյա այս մրցանակաբաշխությունը: Իմ խորին համոզմամբ, մշակույթի և գիտության զարգացումը խթանող, ոլորտում մեծ ավանդ ունեցող մարդկանց գնահատող յուրաքանչյուր նախաձեռնություն, հիրավի, արժանի է խրախուսանքի և այդ համատեքստում, անշուշտ, գնահատելի է նաև LUXURY GROUP-ի նախաձեռնած այս մրցանակաբաշխությունը: Մաղթում եմ, որ ողջունելի այս նախաձեռնության բոլոր անվանակարգերում ամեն տարի մրցանակի արժանանան նորանոր մարդիկ, ովքեր կնպաստեն նաև մայրաքաղաքում ընթացող բարեփոխումներին և զարգացմանը։ Երևանը համայն հայության մայրաքաղաքն է, և մեզանից յուրաքանչյուրի պարտքն է առանձնահատուկ ուշադրությամբ, սրտացավ վերաբերմունքով, ամենօրյա  հոգածությամբ և անձնվեր աշխատանքով նպաստել սիրելի քաղաքի զարգացմանը՝ սեփական ներդրումն ունենալով բոլոր երևանցիների և մայրաքաղաքի հյուրերի բարեկեցության ու հարմարավետության ապահովման գործում։  Համոզված եղեք, որ Երևանի քաղաքապետարանը աջակից է բոլոր այն նախաձեռնություններին, որոնք ուղղված են մեր հինավուրց մայրաքաղաքի զարգացմանն ու մեր ժողովրդի բարեկեցությանը:  Շնորհավորում եմ բոլոր մրցանակակիրներին և մաղթում նորանոր հաջողություններ ու ձեռքբերումներ»: