Հայրենական մեծ պատերազմում տարած հաղթանակի 70-ամյակի առիթով և Մայիսի 9-ին անհայտ զինվորի շիրիմին ծաղիկներ դնելու մեծ ցանկությամբ յոթանասունվեցամյա թոշակառու Գրիգորի Տեփոյանը որոշել է ոտքով ուղևորվել Մոսկվա: Նա արդեն անցել է մոտ 2.000 կիլոմետր, մինչև Մոսկվա մնում է 205 կիլոմետր: Թոշակառուի հետ ճանապարհի մի փոքր հատված անցել է նաև «Мир» հեռուստաընկերության նկարահանող խումբը:

Թոշակառուն պատմել է՝ ինչպես է մեկ տարի առաջ որոշել նման արշավ իրականացնել ու սկսել է մանրամասն պատրաստվել, մարզանք անել, ոտքով շատ քայլել, չնայած այն բանին, որ կինն ու դուստրը թույլ չէին տալիս: Նա ստիպված է եղել խաբել. մարտի 22-ին, երբ բոլորը քնել են, նա թաքուն լքել է Երևանի իր տունը և  մեկնել է ավտոկայան, իսկ այնտեղից ուղևորվել Վրաստան՝ իր հոր տուն, որտեղից իր հայրը ժամանակին մեկնել էր պատերազմ: Պատերազմի պատճառով նրա ընտանիքը կորցրել է 5 անդամի, զոհվել է նաև նրա հայրը:Հենց այդ պատճառով է Գրիշա պապը սկսել իր արշավը:

Նրան մեքենայով հասցրել են ռուսական սահման, որտեղից նա սկսել է քայլարշավը։ Օրական նա անցնում է 40-50 կիլոմետր: Գրիշա պապը պատմել է, որ գիշերելու համար իրենից միայն մի անգամ են գումար վերցրել: Նրան սովորաբար նաև անվճար ուտելիք են հյուրասիրում: